বসুদেৱে বিষ্ণু হেন জানিয়া তোমাক৷

অনেক বিনয়ে বুলিলন্ত স্তুতি-বাক৷৷

পুছিলাহা পৰম ৰহস্য মহাজ্ঞান৷

পিতৃত সমস্তে তত্ত্ব কৰিলা ব্যাখ্যান৷৷ ১

আসিলন্ত লৰি ভৃগু ঋষি পৰীক্ষাক৷

সুখে নিদ্ৰা লভি আছা দেখিলা তোমাক৷৷

জগাইলন্ত ক্রোধে হৃদয়ত লাথি মাৰি৷

ভৃগুক প্ৰণামি স্তুতি বুলিলা মুৰাৰি৷৷ ২২

কৰিলা কাকূতি চৰণত ধৰি হৰি৷

হিয়াত লাগিল সিটো সুকোমল ভৰি৷৷

পাইলা মহাদুখ কিনো আতি অসন্তোষ৷

নিদ্ৰাত আছিলো মোৰ মৰষিয়ো দোষ৷৷ ৩

ঋষিৰ ধূলাৰৰ চিহ্ন ধৰিলাহা হৰি৷

শুক্ল ভৈলা লোম-পান্তি সেহি দিনা দৰি৷৷

তোমাৰ অদ্ভত লীলা জানিবো কিমতে৷

তুমিসি ব্ৰাহ্মণ্য দেৱ জানিল জগতে৷৷ ৪

ভুজঙ্গ-শয্যাত প্ৰভু আছিলাহা শুতি৷

মূৰ্ত্তি ধৰি চাৰি বেদে কৰিলন্ত স্তুতি৷৷

নিদ্ৰাত প্ৰবোধ প্ৰভু কৰাইল তোমাক৷৷

যেন নট-ভাটগণে জগাৱে ৰাজাক৷৷ ৫

সবৰ্ব-গ্ৰাস সূৰ্য্যৰ গ্ৰহণ আসি ভৈলা৷

জানি কৃষ্ণ সবান্ধৱে কুৰুক্ষেত্ৰে গৈলা৷৷

কৃষ্ণ-দৰশন-অভিলাষ মন সুখে৷

আসিলন্ত দেৱ ঋষি নাৰদ প্ৰমুখ্যে৷৷ ৬

সৱাকো অৰ্চ্চিলা হৰি বুলি স্তুতি-বাণী৷

পিতৃৰ কৰাইলা মহাযজ্ঞ চক্রপাণি৷৷

নন্দ যশোদাক পায়া কৰিলা সৎকাৰ৷

দিলা মনোৰথ পূৰি বস্ত্ৰ অলঙ্কাৰ৷৷ ৭

চিৰকাল তোমাক নেদেখি দুয়ো প্ৰাণী৷

কান্দিলা অনেক দুয়ো গলে বান্ধি আনি৷

দৈৱকী ৰোহিণী আসি ধৰি যশোদাক৷

কৰিলা সাদৰ আতি বুলি প্ৰিয় বাক৷৷ ৮

গোপীগণ সহিতে তহিতে যদুৰাই৷

ভৈল চিৰ-বিয়োগে বিৰলে এক ঠাই৷৷

কৃষ্ণক বেঢ়িয়া গোপীগণে কান্দে আতি৷

সৱাকো আশ্বাস কৰিলন্ত বুলি-মাতি৷৷ ৯

কহিলা পৰম জ্ঞান তুমি চক্রপাণি৷

শুনি সৱে তোমাৰ অমৃত-সম বাণী৷৷

জুৰাইল শৰীৰ গোপীগণ ভৈল স্বস্থ৷

দিলা বস্ত্ৰ-অলংকাৰ পূৰি মনোৰথ৷৷ ১০

মহাৰাজ নৃগ মহা কঙ্কলা-স্বৰূপে৷

অধত আছিলা পৰি ঘোৰ অন্ধকূপে৷৷

তুলিবাক নৱাৰিলা অনেক যাদৱে৷

বাম হাতে অপ্ৰয়াসে তুলিলা মাধৱে৷৷ ১১

তযু পৰশনে নৃগ শাপক নিস্তৰি৷

তোমাক নমিলা আসি দণ্ডৱতে পৰি৷৷

অক্ষয় স্বৰ্গক পাছে পাইলা মহাশয়৷

সমস্ত যাদৱগণ ভৈলন্ত বিস্ময়৷৷ ১২

ভণিল শঙ্কৰে শুনিয়োক সবৰ্বজনে৷

কৰিয়ো কৃষ্ণৰ নাম কীৰ্ত্তন যতনে৷৷

নাহিকে বান্ধৱ হৰি-নামত বিনাই৷

মৰিলেও পাইবা ৰাম-নামক সহায়৷৷ ১৩

হেন জানি হৰি নাম লৈয়ো সবৰ্বজনে৷

কলি-যুগে নাহি গতি কীৰ্ত্তনত বিনে৷৷

চাৰিও বেদৰ সাৰ নাম হেন জানি৷

লাজ এৰি বোলা সৱে ৰাম ৰাম বাণী৷৷ ১৪

৷৷ ভৃগু-পৰীক্ষা সমাপ্ত৷৷