ভকতক নিন্দা কৰে অধম৷

জানিবা নামৰ দ্ৰোহী পৰম৷৷

যাত হন্তে ভৈল নামৰ খ্যাতি৷

তাৰ কি নিন্দা নামে সহে আতি৷৷৪৮৷৷

গুণনাম যত বিষ্ণু শিৱৰ৷

তাক ভিন্ন বুদ্ধি কৰে যি নৰ৷৷

নামৰ সিও মহা অপৰাধী৷

নৰকত পৰে দৈৱে নবাধি৷৷৪৯৷৷

যিটো পাপী কৰে নামক হেলা৷

বেদকো জানি নিন্দে যদি কোন বেলা৷৷

নামৰ ইয়ো দুয়ো অপৰাধ৷

ভুঞ্জিবে যাতনা নাহিকে বাধ৷৷৫০৷৷

হৰিৰ নামে কল্পে অৰ্থবাদ৷

নামৰ মহিমা কৰে উচ্ছাদ৷৷

সিজনো নামৰ দ্ৰোহী পৰম৷

নৰকে পচে নাহি তাৰ জন্ম৷৷৫১৷৷

নামত বলে কৰে পাপ বুদ্ধি৷

অষ্টাঙ্গযোগে তাৰ নাহি শুদ্ধি৷৷

নাম অপৰাধী সিয়ো অধম৷

ভুঞ্জিবে যাতনা অনেক জন্ম৷৷৫২৷৷

ধৰ্ম্ম হোম ব্ৰত তীৰ্থত স্নান৷

যতেক আছে মহাযজ্ঞ দান৷৷

আক একে কৰে নামক সৰি৷

কতনো যাতনা ভুঞ্জিবে মৰি৷৷৫৩৷৷

নামক কীৰ্ত্তন কৰন্তে আনে৷

আন মন কৰি নুশুনে কাণে৷৷

অধক যাই সিয়ো হোৱে কলা৷

বাইবেক কাণত তপত শলা৷৷৫৪৷৷

নাহিকে শ্ৰদ্ধা নপাতয় কাণ৷

তাক যিটো দেয় নামক দান৷৷

নামৰ দ্ৰোহী নাহি তাত পৰে৷

ভুঞ্জাইবে যাতনা যম কিঙ্কৰে৷৷৫৫৷৷

শুনিয়া নামৰ মহিমা নীতি৷

তথাপি নামত নকৰে প্ৰীতি৷৷

নামৰ দ্ৰোহী সিও অহঙ্কাৰী৷

ভুঞ্জিবেক কাকে জিহ্বা উভাড়ি৷৷৫৬৷৷

এহি দশ অপৰাধ নামৰ৷

আমাত কৃপায়ে কহিলা হৰ৷৷

পূৰ্ব্বত সমস্ত মুনিৰ আগে৷

তোমাত এৱে কৈলো অনুৰাগে৷৷৫৭৷৷

নামৰ দ্ৰোহ নেৰে যিটো জানি৷

পাপত পচে সিটো মন্দ প্ৰাণী৷৷

মাতৃক ক্রোধে তেজি যেন অন্ন৷

দুঃখ মাত্ৰ পাৱে বালকগণ৷৷৫৮৷৷

এৰিয়া অপৰাধ দেৱ ঋষি৷

নামত যতন কৰা হৰিষি৷৷

নামেসে কৰিবে পৰম সিদ্ধি৷

হৰিৰ নাম জগতৰে নিধি৷৷৫৯৷৷

পুছিলা নাৰদ ঋষি দুনাই৷

যাহাৰ বিজ্ঞান বৈৰাগ্য নাই৷৷

সদায়ে মজি আছে বিষয়তে৷

এড়াইবে নামৰ দ্ৰোহ কিমতে৷৷৬০৷৷

সনত কুমাৰে দিলে উত্তৰ৷

নামৰ দ্ৰোহী যিটো পাপী নৰ৷৷

সততে ফুৰে হৰি নাম গাই৷

তেৱেসে নামৰ দ্ৰোহ এড়াই৷৷৬১৷৷

স্বৰূপ শুনা ঋষি উদাসীন৷

যিজন নাম অপৰাধহীন৷৷

হৰিৰ তেৱে একে নামে তৰে৷

শুনে বা বোলে বা মনত স্মৰে৷৷৬২৷৷

কহিলা ৰহস্য মোত শঙ্কৰে৷

আক যিটো নৰে কীৰ্ত্তন কৰে৷৷

মুকুতি পাৱে এৰাই অপৰাধ৷

কহিলো নাৰদ নাহিকে বাধ৷৷৬৩৷৷

পৰম বান্ধৱ হৰিৰ নাম৷

যিজনে আক লৱে অবিশ্ৰাম৷৷

তাৰ সাত কাৰ্য্য সাধিবে দেখা৷

প্ৰতি প্ৰতি লোৱা সাতৰো লেখা৷৷৬৪৷৷

প্ৰথমে দহিবে পাতকচয়৷

কৰিবে মহাপুণ্য অভ্যুদয়৷৷

কৰাইবে বিষয়ত বিৰকতি৷

কৃষ্ণত বাঢ়িবে প্ৰেম ভকতি৷৷৬৫৷৷

উপজাইবে আতি বৈষ্ণৱী জ্ঞান৷

মায়াক কৰিবে দহি নিৰ্য্যাণ৷৷

চৈতন্য মূৰ্ত্তি পূৰ্ণানন্দ হৰি৷

থৈবন্ত তেন্তেয়েৰে একে কৰি৷৷৬৬৷৷

তেৱেসে নাম হৈব উপশান্ত৷

কহিলো পৰম তত্ত্ব একান্ত৷৷

নাম বিনে নাহি কলিত গতি৷

কলিৰ লোক হৈব পাপমতি৷৷৬৭৷৷

অন্যত্ৰ ধৰ্ম্মে নাহি অধিকাৰ৷

জানিবা কলিত নামেসে সাৰ৷৷

কলিত সদা নুসুমৰে হৰি৷

হেলাত মৰে আত্মঘাত কৰি৷৷৬৮৷৷

কৃষ্ণৰ কিঙ্কৰে কহে শঙ্কৰে৷

মনুষ্য জন্মক নপায় সেন্থৰে৷৷

আকো বৃথা কৰা কিনো অভাগী৷

মাণিক্যক বিকা কাঞ্চক লাগি৷৷৬৯৷৷

কেতিক্ষণে কিবা পৰে বিঘাত৷

তথাপি চেতনা নাহিকে গাত৷৷

আজি কালি কিবা মিলে মৰণ৷

হৰিৰ নামত লৈয়ো শৰণ৷৷৭০৷৷

নকৰিবা নিন্দা মোক মহন্তে৷

আসিল শাস্ত্ৰ বাৰাণসী হন্তে৷৷

তাহাকে চাই নিৱন্ধিলো পদ৷

হৰি হৰি বুলি তৰা আপদ৷৷৭১৷৷