পদ্মপুৰাণৰ স্বৰ্গ খণ্ডত৷

নিৰূপি আছে কলি ধৰ্ম্ম যত৷৷

তাক শুনা আতি একান্ত চিত্তে৷৷

যাৰ ইছা আছে ভৱ তৰিতে৷৷৩৪৷৷

আছে চাৰিসিদ্ধ জ্ঞানী পৰম৷

ব্ৰহ্মাৰ চাৰিয়ো পুত্ৰ প্ৰথম৷৷

তাসম্বাক পায়া নাৰদ ঋষি৷

পুছিলা সংশয় কথা হৰিষি৷৷৩৫৷৷

ঈশ্বৰ ভগৱন্ত কৃপাময়৷

কহিছা যিটো মহাপাপচয়৷৷

কেন মতে হোৱে বিনাশ তাৰ৷

কলিত কোন পুণ্যে পাই পাৰ৷৷৩৬৷৷

কহিয়া ছেদিয়ো সংশয় যত৷

চাৰিও তোৰা মহাভাগৱত৷৷

শুনিয়া সনত কুমাৰ মুনি৷

দিলন্ত উত্তৰ মনত গুণি৷৷৩৭৷৷

গোৱিন্দৰ প্ৰিয় নাৰদ শুনা৷

ভাগৱত ধৰ্ম্ম আপুনি জানা৷৷

হৌক মোক্ষ বুলি সৱে লোকৰ৷

কৰিলা প্ৰশ্ন সংসাৰত সাৰ৷৷৩৮৷৷

যেন মতে পাৱে পাপৰ পাৰ  ৷

শুনা সাৱধানে উত্তৰ তাৰ৷৷

সদায়ে এড়িল আচাৰ ধৰ্ম্ম৷

নভৈল যাৰ কিছু জাতকৰ্ম্ম৷৷৩৯৷৷

শঠবুদ্ধি যিটো জগত  বঞ্চে ৷

দম্ভ অহঙ্কাৰ সদা নুগুচে৷৷

সুৰাপায়ী চাতুকাৰ চাণ্ডাল৷

নিষ্ঠুৰ বাক্য  বােলে সৰ্ব্বকাল৷৷৪০৷৷

পুত্ৰ দাৰা ধন আতেসে ৰতি৷

সৱাতো অধম যি মন্দমতি ৷৷

সিসৱো পাপত হোৱৈ তৰণ৷

যদি হৰি পদে লৱৈ শৰণ৷৷৪১৷৷

দেৱতো উত্তম কৰুণাকৰ৷

মুকুতি পাৱৈ যাত চৰাচৰ৷৷

যিটো থাকে তান দ্ৰোহ আচৰি৷

ভজিলে তাকো নিস্তাৰন্ত হৰি৷৷৪২৷৷

যিটো মন্দমতি অধম নৰে৷

হৰিৰ মহা অপৰাধ কৰে৷৷

নামত শৰণ লৱে বাৰেক৷

নামে হৰে তাৰ সৱে পাতেক৷৷৪৩৷৷

সুহৃদ হৰি নাম সমস্তৰে৷

তাৰ অপৰাধ যি নৰে কৰে৷৷

তাহাৰ ৰক্ষাৰ নাহি উপায়৷

অৱশ্যে সিটো অধোগতি যায়৷৷৪৪৷৷

হৰিয়ো ৰাখিবে নৱাৰে তাক৷

শুনিয়া নাৰদে বুলিলা বাক৷৷

নামৰ কোন অপৰাধগণ৷

লোকৰ যিটো পুণ্য কৰে ছন্ন ৷৷৪৫৷৷

পাপক সাঞ্চি নেয় অধোগতি৷

কহিয়ো নামৰ দ্ৰোহ সম্প্ৰতি৷৷

শুনি মুনি বাক্য বুলিলা তথা৷

পুছিলা পৰম ৰহস্য কথা৷৷৪৬৷৷

পূৰ্ব্বত কহিলা মোত শঙ্কৰে৷

প্ৰকাশিবো আক তােমাৰ তৰে৷৷

শুনা যেন যেন দ্ৰোহ নামৰ৷

হৰি হৰি বোলা সমস্ত নৰ৷৷৪৭৷৷