চাণ্ডালে কৰিছে হৰি কীৰ্ত্তন৷

বুলিয়া নিন্দে যিটো অজ্ঞজন৷৷

তাক সম্ভাষণ যিজনে কৰে৷

আজন্মৰ পুণ্য তেখনে হৰে৷৷৮৮৷৷

বিষ্ণুৰ গুণ-নামে অলঙ্কৃত৷

অন্ত্যজে যিবা কৰি আছে গীত৷৷

তাক নিন্দা কৰে যিটো কুমতি৷

পুণ্যক নাশি যায় অধোগতি৷৷৮৯৷৷

আমাৰ বোলে পতিয়ন নাই৷

দেখিয়ো সুত সংহিতাক চাই৷

ৰজো গুণে কৰে কৰ্ম্মত প্ৰীতি৷

কৰ্ম্মীৰ দম্ভ ভাৱ বাঢ়ে নিতি৷৷৯০৷৷

কৰে হিংসা ধৰ্ম্ম নুপজে বোধ৷

নুগুচয় যেন সৰ্পৰ ক্রোধ৷৷

হাসে বৈষ্ণৱক যিটো নিষ্খল৷

পাপত সমূলঞ্চে যায় তল৷৷৯১৷৷

স্ত্ৰী ধন জন যৌৱন মদে৷

অন্ধ হোৱে বিদ্যা গৰ্ব্বৰ পদে৷৷

বিষ্ণু বৈষ্ণৱক ঝপায়া নিন্দে৷

হৰি নামে যেন কাণত বিন্ধে৷৷৯২৷৷

হৰি ভকতক যিজনে হাসে৷

নুবুজি বেদৰ অৰ্থ বিনাশে৷৷

জগতত বিষ্ণু আছন্ত ব্যাপি৷

শুনিয়া তাক নুবুজয় পাপী৷৷৯৩৷৷

স্ত্ৰী মদ্য মাংস সেৱাৰ কথা৷

কৈ মৰে কৰে জন্মক বৃথা৷

নুবুজে বেদ অভিপায় গূঢ়৷

কৰ্ম্মকো কৰিবে নজানে মূঢ়৷৷৯৪৷৷

মূৰ্খ হুয়া বোলে মঞি পণ্ডিত৷

নষ্ট কৰি ফুৰে আনৰো চিত্ত৷৷

নিষ্কামে কৰিয়া সকলে কৰ্ম্ম৷

বিষ্ণুত অৰ্পিব সিসৱ ধৰ্ম্ম৷৷৯৫৷৷

শ্ৰৱণ কীৰ্ত্তন তাহাৰ ফল৷

মিছাতে নজানি নিন্দে নিষ্খল৷৷

আমাৰ বোলে অপ্ৰত্যয় যাহা৷

একাদশ স্কন্ধে বিচাৰি চাহা৷৷৯৬৷৷

বিষ্ণু বৈষ্ণৱৰ নিন্দা শুনিয়া

নুগুচে কাণত আঙ্গুলি দিয়া৷৷

সমস্ত পুণ্য নষ্ট হোৱে তাৰ৷

নৰকত পৰে নাহি নিস্তাৰ৷৷৯৭৷৷

বিষ্ণু বৈষ্ণৱক কৰে ধিক্কাৰ৷

কাটিবে আণ্টি লৈ জিহ্বাক তাৰ৷৷

শাস্তি কৰিবাক যদি নপাৰি৷

গুচিবে কাণত আঙ্গুলি গাৰি৷৷৯৮৷৷

নিন্দা শুনি যদি তৈৰ নুগুচে৷

কল্পেক মানে নৰকত পচে৷৷

যাইবাক যদি নাই আন থান৷

তথাতে এড়িবে আপুন প্ৰাণ৷৷৯৯৷৷

তেৱেসে হোৱে প্ৰায়শ্চিত্ত আতি৷

দক্ষৰ যজ্ঞত কহিলা সতী৷৷

আমাৰ বোলে অপ্ৰত্যয় যাইবা৷

চতুৰ্থ স্কন্ধত বিচাৰি পাইবা৷৷১০০৷৷

যত তপোধৰ্ম্ম বেদ বেদাঙ্গ৷৷

হৰি নাম বিনা নাহি সুসাঙ্গ৷৷

হেন হৰি নামে নাহি বিশ্বাস৷

কিমতে এৰাইব মৃত্যুৰ ত্ৰাস৷৷১০১৷৷

দ্বাদশ স্কন্ধৰ তত্ত্ব উদ্ধাৰি৷

কহিলন্ত শুকে উপসংহৰি৷৷

জ্ঞানতো কৰ্ম্মতো কৰি সম্প্ৰতি৷

হৰি কীৰ্ত্তনেসে পৰম গতি৷৷১০২৷৷

উৰেষা বাৰানসী ঠাৱে ঠাৱে৷

কবীৰ গীত শিষ্ট সৱে গাৱে৷৷

তথাপিতো আখি ফুটিল তাৰ৷

হৰি কীৰ্ত্তনক কৰে ধিক্কাৰ৷৷১০৩৷৷

শুনা সৰ্ব্বজন কহো সাক্ষাত৷

মূঢ়ৰ বোলত নাহি সঞ্জাত৷৷

বোলোক আসি ভাগৱত চাই৷

তেৱেসে জানো তাৰ মুনিষাই৷৷১০৪৷৷

পুৰাণ সূৰ্য্য মহাভাগৱত৷

বেদান্তৰো ইটো পৰম তত্ত্ব৷৷

তাক নুবুজি ফুৰে নিন্দা কৰি৷

তাৰ মুখ দেখি বুলিবা হৰি৷৷১০৫৷৷