মন্ত্ৰ তন্ত্ৰ আনো দ্ৰব্য অনেক৷

দেশ কাল পাত্ৰ ছিদ্ৰ যতেক৷৷

পূৰ্ণ নুহি যত যজ্ঞৰ অঙ্গ৷

হৰিনামে কৰে সৱে সুসাঙ্গ৷৷১২৩৷৷

বামনৰ আগে শুক্রৰ বাক৷

অষ্টম স্কন্ধত দেখিয়ো তাক৷৷

ভকত জনেসে মোৰ হৃদয়৷

ময়ো ভকতৰ হিয়া নিশ্চয়৷৷১২৪৷৷

মোত বিনে ভক্তে নিচিন্তে আন৷

ভকত বিনে মোৰো নাহি ধ্যান৷৷

দুৰ্ব্বাসাৰ আগে কৈলা মুৰাৰি৷

নৱম স্কন্ধত দেখা বিচাৰি৷৷১২৫৷৷

মুকুতি ৰসকো স্ৰৱে ভকতি৷

তাক এৰি কৰে জ্ঞানত ৰতি৷৷

দুখ মাত্ৰ পাৱে পাছেসে জানে৷

কাষ্ঠ পতানক যেহেন বানে৷৷১২৬৷৷

ব্ৰজৰ তৃণ হৈবো মহাভাগ৷

পাইবো গোপিকাৰ ৰেণুক লাগ৷৷

যাৰ মিত্ৰ ভৈলা জগত পতি৷

ব্ৰহ্মায়ে কৰিলা কৃষ্ণক তুতি৷৷১২৭৷৷

ব্যভিচাৰী দুষ্টা ব্ৰজ যুৱতী৷৷

তথাপি কৃষ্ণত ভৈলা ভকতি৷৷

জানিলো পাপীয়ো ভজোক মাত্ৰ৷

এতেকে ভৈল মুকুতিৰ পাত্ৰ৷৷১২৮৷৷

কৃষ্ণৰ কথাত যিটো ৰসিক৷

ব্ৰাহ্মণ জন্ম তাৰ লাগে কিক৷৷

স্মৰোক মাত্ৰ হৰি দিনে ৰাতি৷

নবাছে ভকতি জাতি অজাতি৷৷১২৯৷৷

নন্দৰ ব্ৰজে যত গোপীজাক৷

সদা বন্দো তান পদধূলাক৷৷

নুগুচে হৰি গীত দিনে ৰাতি৷

জগতকে কৰে পৱিত্ৰ আতি৷৷১৩০৷৷

উদ্ধৱে বন্দিলা গোপীৰ ধূলি৷

আৱে মূঢ়জনে নিন্দে কি বুলি৷৷

শৰীৰ শৱক মঞি বোলে চিত্তে৷

মমতা কৰে পুত্ৰ ভাৰ্য্যা বিত্তে৷৷১৩১৷৷

তীৰ্থ বুলি কৰে জলত শুদ্ধি৷

প্ৰতিমাত কৰে দেৱতা বুদ্ধি৷৷

বৈষ্ণৱত নাই ইসৱ মতি৷

গৰুতো অধম কৃষ্ণ বদতি৷৷১৩২৷৷

একান্তে মৰে কৰ্ম্ম মাত্ৰ কৰি৷

হৃদয়ে থাকিয়া বিদূৰ হৰি৷৷

শ্ৰৱণ কীৰ্ত্তনে যাৰ অভ্যাস৷

নছাড়ে হৰি তাৰ আসি পাশ৷৷১৩৩৷৷

মিছা তৰ্কবাদে ভৈলো আন্ধাৰ৷

নপাঞো জ্ঞান পন্থ কৰি বিচাৰ৷৷

মাধৱ বামন গোৱিন্দ বুলি৷

কৈসানি মুকুত হৈবো সমূলি৷৷১৩৪৷৷

দশম স্কন্ধত বেদৰ স্তুতি৷

আক নমানিবে কোন যুগুতি৷৷

পাষণ্ডেসে নিন্দে বেদৰ বাণী৷

তাৰ সম্ভাষণ এৰিবা জানি৷৷১৩৫৷৷

কৰ্ম্ম তপ জ্ঞানে সাধে যি গতি৷

দানে বা সন্ন্যাসে পাৱে সম্প্ৰতি৷৷

ভকতে সুখে বসি পাৱে তাক৷

উদ্ধৱৰ আগে কৃষ্ণৰ বাক৷৷১৩৬৷৷

পৰম অহিংসা ধৰ্ম্ম সন্ন্যাসে৷

নপাৱে যি মোক জ্ঞান অভ্যাসে৷৷

ভকতেসে কৰে আমাক বশ্য৷

কহিলো উদ্ধৱ ইটো ৰহস্য৷৷১৩৭৷৷

গৰু গোপিকা পশু বৃক্ষবন৷

নাহি জন্মান্তৰে কিছু সাধন৷৷

এহি জন্মে মাত্ৰ কৰি ভকতি৷

পাইলেক সকলে মোহোৰ গতি৷৷১৩৮৷৷

অশুদ্ধ মনৰ কৰ্ম্মসকল৷

স্ৰৱে যেন আৱাঁ ঘটৰ জল৷৷

কৃষ্ণৰ বাক্য পাষাণৰ ৰেখা৷

একাদশ স্কন্ধে বিচাৰি দেখা৷৷১৩৯৷৷

বোলন্ত শুকে কিনো ভৈল খেদ৷

পাষণ্ডে কৰিবে বুদ্ধিক ভেদ৷৷

কলিত হৰিৰ কীৰ্ত্তন এৰি৷

ফুৰিবে লোকে আন কৰ্ম্ম কৰি৷৷১৪০৷৷

পাইবেক শ্ৰম তপ ব্ৰত কৰি৷

একান্তে যিটো নুসুমৰে হৰি৷৷

জ্ঞানতো কৰ্ম্মতো কৰিয়া নৰ৷

হৰি কীৰ্ত্তনত কৰা আদৰ৷৷১৪১৷৷

দ্বাদশ স্কন্ধত সেহিসে কৈলা৷

তথাপি মূঢ়ৰ বোধ নভৈল৷৷

কৰে উপালম্ভ হৰি কীৰ্ত্তনে৷

আত্মঘাত কৰি মৰে আপুনে৷৷১৪২৷৷

বিষ্ণু ভকতক দেখিয়া হাসে৷

আপুনিয়ো নষ্ট আনকো নাশে৷৷

কীৰ্ত্তন শুনিয়া সম্যকে মৰে৷

জানিবা নিতে মহাপাপ কৰে৷৷১৪৩৷৷

হৰি ধ্বনি শুনি বিহ্বল হুই৷

হিয়াত তাৰ লাগে যেন জুই৷৷

সমস্তে শাস্ত্ৰতে কৰিয়া সাৰ৷

পাষণ্ড-মৰ্দ্দন নাম ইহাৰ৷৷১৪৪৷৷

এহিসে মৰ্দ্দিবে পাষণ্ড মতি৷

জানিবা কলিত নামেসে গতি৷

কৃষ্ণৰ কিঙ্কৰ শঙ্কৰে ভণে৷

বোলা হৰি হৰি সমস্ত জনে৷৷১৪৫৷৷