কীৰ্ত্তন মহিমা শুনা উৎসুকে৷

বাহ্ৰয় স্কন্ধত যি কৈলা শুকে৷৷

সকল ধৰ্ম্মতে কৰি বিশিষ্ট৷

হৰি কীৰ্ত্তনেসে ধৰ্ম্ম গৰিষ্ঠ৷৷১০৬৷৷

অনাদৰি আন ধৰ্ম্ম সম্প্ৰতি৷

দিয়োঁ উপদেশ হৰি ভকতি৷৷

ব্যাসৰ শুনি চিত্ত শান্ত ভৈল৷

প্ৰথম স্কন্ধত নাৰদে কৈল৷৷১০৭৷৷

সমস্ত বেদক ব্ৰহ্মায়ে আনি৷

বিচাৰিলা তিনিবাৰ প্ৰমাণি৷৷

এহিমানে মাত্ৰ কৰিলা সাৰ৷

হৰি কীৰ্ত্তনেসে তৰে সংসাৰ৷৷১০৮৷৷

হেন জানি ৰাজা একান্ত মনে৷

কৰিয়ো যতন হৰি কীৰ্ত্তনে৷৷

ৰাজাত কহন্ত শুকে প্ৰবন্ধে৷

বিচাৰি দেখিয়ো দ্বিতীয় স্কন্ধে৷৷১০৯৷৷

আতি লৱলেশ বিষয় সুখ৷

তাক লাগি ভৈল হৰি বিমুখ৷৷

নকৰে ৰতি হৰি কীৰ্ত্তনত৷

আপুন কৰ্ম্মে সিয়ো ভৈল হত৷৷১১০৷৷

সিটো চাণ্ডালক গৰিষ্ঠ মানি৷

যাৰ জিহ্বাগ্ৰে থাকে হৰি বাণী৷৷

সমস্তে তীৰ্থতে কৰিল স্নান৷

কৰিলে সৱ তপ হোম দান৷৷১১১৷৷

সেহিসে কুলীন বেদক বুজে৷

যাহাৰ মুখে হৰি নাম সিজে৷৷

পৰম তত্ত্ব জানি দেৱহূতি৷

তৃতীয় স্কন্ধত কৰিলা স্তুতি৷৷১১২৷৷

নলাগে লীন মুকুতিকো তথা৷

নাহি হৰিপদ পঙ্কজ যথা৷৷

কৰ্ণৰ অমৃত হৰি চৰিত৷

ভকতৰ মুখে শুনিবে নিত৷৷১১৩৷৷

হৰি কথামৃত কণাৰ বাৱে৷

দুনাই আত্মজ্ঞান সুমৰাৱে৷৷

নলাগে বৰ নমাগোহো তাক৷

চতুৰ্থ স্কন্ধত পৃথুৰ বাক৷৷১১৪৷৷

জ্বৰ মৰণৰ সময়ে দুঃখে৷

তযু গুণ নাম নছাড়ো মুখে৷৷

মাগন্ত ঋত্বিজে বৰ প্ৰবন্ধে৷

নাভিৰ যজ্ঞত পঞ্চম স্কন্ধে৷৷১১৫৷৷

পঞ্চম মহাপাপী যিটোজন৷

তাৰো প্ৰায়শ্চিত্ত হৰি কীৰ্ত্তন৷৷

তাক লাগি ভৈল হৰিৰ মতি৷

ইটো মোৰ ভৈল ৰাখো সম্প্ৰতি৷৷১১৬৷৷

ব্ৰহ্মবধী গুৰুবধী যতেক৷

পিতৃ-মাতৃবধী পাপী অনেক৷৷

কুকুৰ খায় হেন ম্লেছগণে৷

সিও শুদ্ধ হোৱে হৰি কীৰ্ত্তনে৷৷১১৭৷৷

চাণ্ডালো হৰি নাম লৱে মাত্ৰ৷

কৰিবে উচিত যজ্ঞৰ পাত্ৰ৷৷

পাপৰ আলু উভাৰয় নামে৷

আক তুচ্ছ কৰি মৰে কি কামে৷৷১১৮৷৷

নামৰ মহিমা জানি সমূলি৷

জগতৰে মোক্ষ হৈবেক বুলি৷৷

পূৰ্ব্বত আৰু গোপ্য কৰি থৈলা৷

দেখিয়ো ষষ্ঠ স্কন্ধে শুকে কৈল৷৷১১৯৷৷

নলাগে দেৱ দ্বিজ ঋষি হুইবে৷

নলাগে সমস্ত শাস্ত্ৰ জানিবে৷৷

মিছাত মৰে আন কৰ্ম্ম কৰি৷

হোৱন্ত ভকতিতে তুষ্ট হৰি৷৷১২০৷৷

যক্ষ ৰক্ষ দৈত্য ব্ৰজৰ বাসী৷

পক্ষী মৃগগণ চাণ্ডালো আসি৷৷

একান্তে কৰিয়া হৰি ভকতি৷

মহাসুখে পালে পৰম গতি৷৷১২১৷৷

সপ্তম স্কন্ধত প্ৰহ্লাদৰ বাণী৷

দেখিয়ো বিচাৰ কৰিয়া আনি৷৷

মূৰ্খৰ কথা সৱে পৰিহৰি৷

সদায়ে ডাকিয়া ঘুষিয়ো হৰি৷৷১২২৷৷