পাছে মুচুকুন্দ ৰায়৷

সোধে মাধৱক চাই৷৷

কোন তুমি থাকা কৈত৷

কি কাৰ্য্যে ভ্ৰমিছা ঐত৷৷১৩৬৭৷৷

পদ্মপত্ৰ সম ভৰি৷

কণ্টকত কেন কৰি৷৷

ফুৰা গিৰি গহ্বৰত

নুবুজো তোমাৰ মত৷৷১৩৬৮৷৷

কিবা ইন্দ্ৰ সূৰ্য্য শশী৷

মূৰ্ত্তি ধৰি আছা আসি৷৷

ব্ৰহ্মা বিষ্ণু ত্ৰিনয়ন৷

তাসম্বাৰ একজন৷৷১৩৬৯৷৷

আসি আছা তুমি স্বামী৷

মূৰ্ত্তি দেখি বোলো আমি৷৷

জন্ম কৰ্ম্ম গোত্ৰ নাম৷

কৈয়ো যদি আছে কাম৷৷১৩৭০৷৷

আমাৰ শুনিয়ো কথা৷

ইক্ষ্বাকু বংশত তথা৷৷

মান্ধাতাত ভৈলো জাত৷

মুচুকুন্দ নামে খ্যাত৷৷১৩৭১৷৷

উজাগৰে শ্ৰান্ত হুয়া৷

গহ্বৰত আছো শুয়া৷৷

মোক জগাই কোন জনে৷

ভস্ম ভৈল তাৱক্ষণে৷৷১৩৭২৷৷

তোমাক দেখিলো পাছে৷

দেহা প্ৰকাশন্তে আছে৷৷

তোমাৰ দুঃসহ জৌতি৷

নিষ্প্ৰভ কৰিলে আতি৷৷১৩৭৩৷৷

দেখি মহা চমৎকাৰ৷

সুুধিবে নৱাৰো আৰ৷৷

এহি বুলি মৌন ভৈলা৷

মাধৱে কহিবে লৈলা৷৷১৩৭৪৷৷

মোৰ জন্ম কৰ্ম্ম যত৷

কোনে কহি পাৱৈ অন্ত৷৷

তথাপিতো নৃপবৰ৷

শুনা কথা ইজন্মৰ৷৷১৩৭৫৷৷

প্ৰাৰ্থিলন্ত প্ৰজাপতি৷

ধৰ্ম্মক ৰাখিবে প্ৰতি৷৷

যদুকুলে ভৈলো জাত৷

বসুদেৱ মোৰ তাত৷৷১৩৭৬৷৷

আতেসে পণ্ডিত লোকে৷

বাসুদেৱ বোলে মোকে৷৷

কালনেমি দৈত্য বংশ৷

ভৈল আসি ৰাজা কংস৷৷১৩৭৭৷৷

লীলায়ে মাৰিলো তাক৷

আনো যত দৈত্যজাক৷৷

বধিলো সমৰে সৱে৷

দুৰ্জ্জন যৱন এৱে৷৷১৩৭৮৷৷

তযু তেজে ভস্ম ভৈল৷

মহাভাৰ দূৰ গৈল৷৷

তোমাকেসে দয়াতৰে৷

আইলো ঐকে একেশ্বৰে৷৷১৩৭৯৷৷

তুমি মোৰ প্ৰিয়তৰ৷

যেহি লাগে লৈয়ো বৰ৷৷

কহিয়োক অভিপ্ৰায়৷

ভক্তৰ দুৰ্ল্লভ নাই৷৷১৩৮০৷৷

কৃষ্ণৰ কিঙ্কৰে ভণে৷

শুনিয়োক সৰ্ব্বজনে৷৷

সমস্ত সমাজে ঢাকি৷

হৰি হৰি বোলা ডাকি৷৷১৩৮১৷৷