মাধৱে বোলন্ত শুনা মুচুকুন্দ ৰায়৷

তোমাৰ নিৰ্ম্মল মতি ভৈলা সমুদায়৷৷

প্ৰলোভিলো বৰ লোৱা বুলি বাৰম্বাৰ৷

তথাপিতো কিছু বাঞ্ছা নভৈল তোমাৰ৷৷১৩৯১৷৷

বৰ দিবে চাহিলো তোমাক দায়া পদে৷

ভকতক লঙ্ঘিবাক নপাৰে শ্ৰীমদে৷৷

যোগক অভ্যাসে যিটো ভকতিক এৰে৷

তাহাৰেসে মন দুনাই বিষয়ত পৰে৷৷১৩৯২৷৷

মোত চিত্ত দিয়া পৰ্য্যটিয়ো বসুমতী৷

তোমাৰ আমাত আছে একান্ত ভকতি৷৷

ক্ষত্ৰিয়ৰ ধৰ্ম্মত থাকিয়া নৃপবৰ৷

কৰি আছা বধ তুমি জন্তু বহুতৰ৷৷১৩৯৩৷৷

শ্ৰৱণে কীৰ্ত্তনে মোক কৰিয়া আশ্ৰয়৷

তপ কৰি এৱে সিটো পাপ কৰা ক্ষয়৷৷

আউৰ জন্মত তুমি হুইবা দ্বিজবৰ৷

মোক পাইবা আসি ৰাজা তেজি কলেবৰ৷৷১৩৯৪৷৷

পূৰ্ব্বতো অনেক যজ্ঞে যজি আছা মোক৷

মঞি ৰক্ষা কৰিবো নিৰ্ভয়ে চলিয়োক৷৷

হেন অনুগ্ৰহ আজ্ঞা পায়া মাধৱৰ৷

কৰিলা কৃষ্ণক প্ৰদক্ষিণ নৃপবৰ৷৷১৩৯৫৷৷

চৰণে প্ৰণামি বাজ ভৈলা গহ্বৰৰ৷

দেখে ক্ষুদ্ৰ ভৈল সৱে বৃক্ষ পশু নৰ৷৷

পাইল কলি যুগে আসি মানি মহাৰথ৷

ধৰিলন্ত উত্তৰ দিশক লাগি পথ৷৷১৩৯৬৷৷

ভৈলন্ত নিঃশঙ্ক তপ আচৰিবে মনে৷

কৰিলা একান্ত চিত্ত কৃষ্ণৰ চৰণে৷৷

বদৰিকাশ্ৰমে গৈয়া ধৰিয়া সমাধি৷

থাকিলন্ত মুচুকুন্দ কৃষ্ণক আৰাধি৷৷১৩৯৭৷৷

পাছে দুনাই আসিয়া মাধৱ মথুৰাক৷

মাৰিলন্ত তিনিকোটি যৱন সেনাক৷৷

তাৰ ধন মানে সৱে বলদ যোড়াইল৷

দ্বাৰকাত নিয়া যদুৰাজাত যোগাইল৷৷১৩৯৮৷৷

তেইশ অক্ষৌহিণী সেনা সাজিয়া প্ৰবন্ধে৷

সেহি সময়ত খেদি আইলা জৰাসন্ধে৷৷

পৰম আটোপে মহাকোপে আসে ধাই৷

দেখি লৰ দিলা ৰাম কৃষ্ণ দুয়ো ভাই৷৷১৩৯৯৷৷

মনুষ্য চেষ্টাক দেখাই যেন ভয়াতুৰ৷

ভৰিগতি দুয়ো পলাই গৈলা বহুদূৰ৷৷

হেন দেখি ৰঙ্গে আসি মাগধ নিষ্খলে৷

ধৰ বুলি পাছে পাছে খেদে সমদলে৷৷১৪০০৷৷

পলাইবে নপাৰি যেন ৰাম দামোদৰে৷

আৰোহিলা পৰ্ব্বতৰ উচ্ছ্ৰিত শিখৰে৷৷

পৰ্ব্বতক বেঢ়িয়া সসৈন্যে জৰাসন্ধে৷

লগাইলেক জুই তাত অনেক প্ৰবন্ধে৷৷১৪০১৷৷

এঘাৰ যোজন সিটো পৰ্ব্বত উচ্ছ্ৰিত৷

তাৰপৰা ডেৱে দুয়ো নামিলা ভূমিত৷৷

নলক্ষিলে কেৱে শত্ৰু সেনা তাসম্বাক৷

ৰঙ্গে ৰাম কৃষ্ণ দুয়ো গৈলা দ্বাৰকাক৷৷১৪০২৷৷

দগ্ধ ভৈলা ৰাম কৃষ্ণ মানি মহাবলী৷

জৰাসন্ধো সসৈন্যে দেশক গৈলা চলি৷৷

নজানয় ঈশ্বৰৰ বলৰ প্ৰমাণ৷

শত্ৰু বুদ্ধি খেদে সিটো পৰম অজ্ঞান৷৷১৪০৩৷৷

কৃষ্ণৰ কিঙ্কৰে গীত ভণিল শঙ্কৰে৷

কৃষ্ণৰ কীৰ্ত্তন নছাড়িবা একো নৰে৷৷

পাপ সাগৰত ইসে কৰিবে নিস্তাৰ৷

বোলা হৰি হৰি হৌক পুৰুষ উদ্ধাৰ৷৷১৪০৪৷৷