শুনি পাৰ্থে আথেবেথে গৈল দঢ় হুই ৷

কৰিলন্ত আচান্ত পৱিত্ৰ জল ছুই ৷৷

ইষ্টদেৱ শঙ্কৰক নমিলা অৰ্জ্জুন ৷

দিব্য অস্ত্ৰ স্মৰি গাণ্ডীৱত দিলা গুণ ৷৷১৫৩৮৷৷

টঙ্কাৰিয়া দিব্য অস্ত্ৰচয়ক জাকিলা ৷

অধে-ঊৰ্দ্ধে সিটো সূতিগৃহক ঢাকিলা ৷৷

নথাকিল সন্ধি চাইলা আঞ্জৰ পাঞ্জৰ ৷

গৃহক ঢাকিয়া শৰে সাজিলা পিঞ্জৰ ৷৷১৫৩৯৷৷

সেহি বেলা উপজিল বিপ্ৰৰ কুমাৰ ৷

পৃথিৱীত পৰিয়া কান্দিলা বাৰম্বাৰ ৷৷

তেখনে অদৃশ্য ভৈল শৰীৰ সহিতে ৷

নাকলিলা কেৱে তাক আগতে তহিতে ৷৷১৫৪০৷৷

দেখি পাছে বিপ্ৰে পুত্ৰশোকৰ জমক ৷

কেশৱৰ আগত ভৰ্ৎসিলা অৰ্জ্জুনক ৷৷

মই কেন মূঢ় দেখিয়োক সৰ্ব্বজনে ৷

কৰিলো সঞ্জাত নপুংসকৰ বচনে ৷৷১৫৪১৷৷

সবংশে কেশৱে নৱাৰিলে ৰাখিবাক ৷

আৰ কোনে পৰিত্ৰাণ কৰিবে আমাক ৷৷

বিধিৰ বিপাকে যিটো দৈৱে ভৈল নাশ ৷

কিনো মূৰ্খ তই তাক ৰাখিবাক চাস ৷৷১৫৪২৷৷

ধিক ধনঞ্জয় ধিক গাণ্ডীৱ তোমাৰ ৷

মিছা কাৰ্য্যে কিসক কৰিলি অঙ্গীকাৰ ৷৷

বিকৰ্থনা অনেক কৰিল দ্বিজবৰ ৷

শুনি নসহিল অৰ্জ্জুনৰ কলেৱৰ ৷৷১৫৪৩৷৷

ধনু তুলি ধৰি পাছে মহা বিদ্যা কৰি ৷

তেখনে আণ্টাইল গৈয়া যমৰ নগৰী ৷৷

পাতপাত কৰি বিচাৰিলা মহাভাগ ৷

বিপ্ৰৰ পুত্ৰক তৈতো নপাইলেক লাগ ৷৷১৫৪৪৷৷

ইন্দ্ৰৰ নগৰে গৈয়া বিচাৰিলা পশি ৷

তৈতো বিপ্ৰপুত্ৰক নপাইলা মহাযশী ৷৷

অগনি বৰুণ বায়ু চন্দ্ৰ নৈৰ্ঋতিৰ ৷

সৱাৰো থানক বিচাৰিলা মহাবীৰ ৷৷১৫৪৫৷৷

বিতবিত কৰিলন্ত সাতো পাতালক ৷

তৈতো খুজি নপাইলন্ত বিপ্ৰৰ পুত্ৰক ৷৷

একোস্থানে বিচাৰিবে নথাকিল ঠাই ৷

উলটিয়া দ্বাৰকাক আসিলা দুনাই ৷৷১৫৪৬৷৷

ভ্ৰষ্ট ভৈল অঙ্গীকাৰ জানিয়া নিশ্চয় ৷

অগনিত জাম্প দিবে যান্ত ধনঞ্জয় ৷৷

হেন দেখি সখিক ধৰিলা হৰি আসি ৷

মৰিবাক নিদিয়া বুলিলা পাছে হাসি ৷৷১৫৪৭৷৷

দেখাইবো দ্বিজৰ সৱে পুত্ৰক তোমাক ৷

নকৰিয়ো জাস সখি ৰাখা আপুনাক ৷৷

তোমাৰ বিপুল কীৰ্ত্তি থাকিবে লোকত ৷

মোহোৰ বচনে নকৰিবা প্ৰাণ হত ৷৷১৫৪৮৷৷

কৃষ্ণৰ কিঙ্কৰে কহে শঙ্কৰে সম্প্ৰতি ৷

হৰিনাম বিনে আৰ নাহি কাৰো গতি ৷৷

বেদৰ প্ৰমাণ বাণী জানি সৰ্ব্বজন ৷

বোলা হৰি হৰি কৰি অনেক যতন ৷৷১৫৪৯৷৷