পৰম মঙ্গল হৰিনাম ধৰ্ম্ম

যাহাৰ থাকে মুখত৷

তাৰ তেতিক্ষণে ভষ্ম হুয়া যায়

মহাপাপ কোটি শত৷৷

তাৱদেকে মহা পাতক হস্তীৰ

থাকে মহা গৰ্ব্বমদ৷

যাৱে ৰামনাম প্ৰমত্ত সিংহৰ

নুশুনে ধ্বনি শৱদ৷৷২০৫৷৷

ৰাম হেন ইটো দুগুটি অক্ষৰ

সদায়ে আদৰে গাৱে৷

সংসাৰ সাগৰ তৰি সিটো নৰে

দুৰ্ল্লভ মোক্ষক পাৱে৷৷

হুইবে মলমতি লোকৰ নিশ্চয়

গুচিবে সৱে আচাৰ৷

কলিযুগে আৰ অন্যত্ৰ ধৰ্ম্মত

কাৰো নাহি অধিকাৰ৷৷২০৬৷৷

আন ধৰ্ম্ম এৰি হৰিনাম স্মৰি

সুখে পাৱে যেন গতি৷

অনেক প্ৰবন্ধে সমস্ত ধাৰ্ম্মিকে

নপাৱে তাক সম্প্ৰতি৷৷

সদায় বিষ্ণুক স্মৰিবে ক্ষণিকো

নপাসৰিবাহা নৰ৷

যত মহাপাপ যত মহাপুণ্য

ই দুইৰ সৱে কিঙ্কৰ৷৷২০৭৷৷

দোষৰ নিদান কলিযুগ আত

এক মহাগুণ আছে৷

কেৱল কীৰ্ত্তনে সংসাৰৰ বন্ধ

এৰাই মোক্ষ পাৱে পাছে৷৷

হৰিৰ নামেসে নামেসে নামেসে

জীৱন আৱে আমাৰ৷

কলিযুগে আন গতি নাই নাই

নাই জানা সাৰে সাৰ৷৷২০৮৷৷

আউৰ বেদাগম বিস্তৰ শাস্ত্ৰত

নাহি কিছু প্ৰয়োজন৷

ধৰ্ম্মক আশায়ে অনেক তীৰ্থক

কি কাৰ্য্যে কৰা গমন৷৷

যদি অভিলাষ কৰা সৰ্ব্বজন

আপুন মোক্ষ কাৰণ৷

গোৱিন্দ গোৱিন্দ বুলিয়া বেকতে

কৰিয়ো হৰিকীৰ্ত্তন৷৷২০৯৷৷

ইটো হৰিনামে লোকৰ যতেক

পাতক নিৰ্য্যাণ কৰে৷

ততেক পাতক প্ৰবন্ধে কৰিবে

নৱাৰে পাতকী নৰে৷৷

ব্ৰহ্মচাৰী গৃহ- বাসী বনবাসী

সন্ন্যাসী যতেক যতি৷

হৰিৰ কীৰ্ত্তন এৰি কেহো নৰে

নপাৱে পৰম গতি৷৷২১০৷৷

সূৰ্য্যগ্ৰহণত এক কোটি ধেনু

ব্ৰাহ্মণক দেয় দান৷

প্ৰয়াগ গঙ্গাৰ জলত নিৱাস

কৰে দশ কল্পমান৷৷

অযুতেক যজ্ঞ কৰে মেৰু সম

সুৱৰ্ণক দেয় দান৷

এক শত ভাগো গোৱিন্দ নামৰ

ৰেণুকো নুহি সমান৷৷২১১৷৷

হৰি হেন ইটো দুগুটি অক্ষৰ

উচ্চাৰিলে একবাৰ৷

মোক্ষৰ পথক যাইবাক লাগিয়া

সিয়ো ভৈল কাছপাৰ৷৷

হৰিৰ নামৰ অনন্ত মহিমা

কহিবে কাৰ শকতি৷

যদি চাৰি মুখে ব্ৰহ্মায়ো কহন্ত

তভো নুহি সমাপতি৷৷২১২৷৷

কৃষ্ণৰ কিঙ্কৰে ভণিলা শঙ্কৰে

শুনিয়োক সৰ্ব্বজন৷

হেন জানি আন আলজাল এৰি

কৰিয়ো হৰিকীৰ্ত্তন৷৷

কোন দিন ইটো শৰীৰ পৰয়

কেতিক্ষণে নেয় যম৷

আউৰ কি সেন্থৰে ভাৰত ভূমিত

হৈবাহা মনুষ্য জন্ম৷৷২১৩৷৷

কোটি কোটি জন্ম অন্তৰে যাহাৰ

আছে মহা পুণ্যৰাশি৷

সি সি কদাচিত মনুষ্য হোৱয়

ভাৰত বৰিষে আসি৷৷

দেৱৰো দুৰ্ল্লভ ইহেন জন্মক

ব্যৰ্থ কৰা কোন কামে৷

গৃহতে থাকিয়া হৰিক স্মৰিয়া

মোক্ষ সাধা হৰিনামে৷৷২১৪৷৷

কোটি এক ৰাজ- সূয় অশ্বমেধ

যজ্ঞ আক নুহি সৰি৷

হেন হৰিনাম নলৈয়া হেলাত

মৰে আত্মঘাত কৰি৷৷

হেন বেদবাণী তত্ত্বহেন জানি

আসনতে সুখে থাকি৷

আপুনাকো তাৰা পুৰুষ উদ্ধাৰা

হৰি হৰি বোলা ডাকি৷৷২১৫৷৷