শুনিয়ো পাৰ্ব্বতী মই পূজিলো হৰিক৷

মনে হেন হৈবে সাধু কৃষ্ণতো অধিক৷৷

বহুবিধ ভকতি কৰিলো বাহিৰত৷

সদায় নুগুচে মোৰ কপট চিত্তত৷৷৬৩৷৷

কহিলো পাৰ্ব্বতী হৃদয়ৰ কথা ভাঙ্গি৷

নুগুচিল অহঙ্কাৰ মাধৱক লাগি৷৷

যদ্যপি কৰিলো মই কপট ভকতি৷

তথাপিতো তুষ্ট ভৈলা ত্ৰিজগত পতি৷৷৬৪৷৷

কিনো দয়াময় প্ৰভু ভকত বৎসল৷

কপট সেৱাত মোৰ কৰিলা কুশল৷৷

দিব্যৰূপে দেখা মোক দিলন্ত মাধৱে৷

চাহিলো নয়ন ভৰি পৰম উৎসুকে৷৷৬৫৷৷

দণ্ডৱতে প্ৰণামিলো কৃষ্ণৰ চৰণ৷

পাছে নাৰায়ণে মোক বুলিলা বচন৷৷

মোত কৰি তোমাতে অধিক হৈবে মান৷

যেনমতে হৈবে তাৰ কহিবো কাৰণ৷৷৬৬৷৷

তোমাক পূজিবো মই পৃথিৱীক গৈয়া৷

তযু যশ বঢ়াইবো তোমাতে বৰ লৈয়া৷৷

দ্বাপৰ যুগত আদি ত্ৰেতাৰ অন্তত৷

অৱতাৰ হৈবোহো আপুনি জগতত৷৷৬৭৷৷

আমাৰ বচনে তুমি হেন কৰিয়োক৷

শাস্ত্ৰ কৰি মনুষ্যৰ লোভ বঢ়ায়োক৷৷

আগমত দেখায়োক সংসাৰৰ সুখ৷

তাক দেখি হোৱে যেন আমাত বিমুখ৷৷৬৮৷৷

আমাৰ ভকতি পন্থ সৱে হৌক ছন৷৷

আন দেৱ পূজাত সৱাৰো হৌক মন৷৷

আগম দেখায়া কৰা আমাক গুপুত৷

তেৱেসে প্ৰজাৰ পুষ্টি হৈবেক বহুত৷৷৬৯৷৷

মাধৱৰ বাক্য হেন শুনিলোহো আমি৷

পাছে ভয় হুয়া হেন বুলিলা প্ৰণামি৷৷

সহস্ৰেক ব্ৰহ্মবধ যদি কৰে নৰে৷

তোমাৰ সেৱায়ে তাকো তৰিবাক পাৰে৷৷৭০৷৷

যদিবা তোমাক প্ৰভু কৰে অহঙ্কাৰ৷

সিটো পাতকৰ আৱে নেদেখো নিস্তাৰ৷৷

শত কোটি কল্প মানে নৰকত পচে৷

কদাচিটো সিটো মহাপাতক নুগুচে৷৷৭১৷৷

কি কৰি পৱিত্ৰ মই হৈবো নাৰায়ণ৷

সেই উপদেশ দিয়া পাতকনাশন৷৷

যদি হেন তোমাক আগমে কৰো ছন৷

তেৱে মোৰ হুইবেক পাতক অমোচন৷৷৭২৷৷

মাধৱে বোলন্ত শুনা শঙ্কৰ সম্প্ৰতি৷

মোৰ নাম লৈলে পাপ যাইবে অধোগতি৷৷

সহস্ৰেক নামে মোৰ পাতক তৰিবা৷

সৱাতো অধিক তুমি মোৰ প্ৰিয় হৈবা৷৷৭৩৷৷

কৰে মোৰ নামে তিনিলোকক পৱিত্ৰ৷

মুকুতি পদক দেই আত কোন চিত্ৰ৷৷

মোৰ নাম লৈলে মোৰ চৰণক পাৱে৷

পৰম ঐশ্বৰ্য্য দেঞো যাক যিবা ভাৱে৷৷৭৪৷৷

জানিবা শঙ্কৰ মোৰ বাক্য নুহি মিছা৷

মোৰ নাম লৈলে পাইবা মনে যেন ইছা৷৷

সহস্ৰেক নাম পাছে আমাৰ আগত৷

কহিলা সকলে হৰি কৰিয়া বেকত৷৷৭৫৷৷

শুনিলো প্ৰভুৰ মুখে সহস্ৰেক নাম৷

ধৰিলো নিশ্চয় কৰি পূৰ্ণ ভৈল কাম৷৷

সেহি সহস্ৰেক নাম জপো মঞি মনে৷

কহিলো ৰহস্য তুমি ভাৰ্য্যাৰ কাৰণে৷৷৭৬৷৷

ৰত্নাকৰ কন্দলি কহিলা যেন সাৰ৷

ৰামনাম বিনা নাই সংসাৰ নিস্তাৰ৷৷

জানিয়া যতনে মাধৱৰ নাম ধৰা৷

ৰামনাম ভাবিয়া সংসাৰ সুখে তৰা৷৷৭৭৷৷