শুনিয়া হাসি চাইলা চক্রপাণি৷

নোহন্ত আদিত্য বুলিলা বাণী৷

মণিৰ ৰশ্মি হুয়া প্ৰকাশিত৷

গৃহক লাগি আসে সত্ৰাজিত৷৷১৪১২৷৷

সত্ৰাজিত পাছে গৃহক আইলা৷

অনেক মাঙ্গল্য বাদ্য বজাইলা৷৷

দেৱৰ গৃহে পশি প্ৰণিপাতে৷

নিৱেদিলা মণি বিপ্ৰৰ হাতে৷৷১৪১৩৷৷

মণিৰ মহিমা কি কৈবো আৰ৷

সুৱৰ্ণ নিতে স্ৰৱে অষ্ট ভাৰ৷৷

যি স্থানে থাকে সিটো স্যমন্তক৷

নাহিকে দুৰ্ভিক্ষ মাৰিমৰক৷৷১৪১৪৷৷

নাহিকে ব্যাধি ব্যাঘ্ৰ সৰ্পভয়৷

একো উপসৰ্গ নুপজে তয়৷৷

দিনেক মণি খুজিলন্ত হৰি৷

নিদিলা সত্ৰাজিতে গহ কৰি৷৷১৪১৫৷৷

প্ৰসেন নামে তাৰ ভ্ৰাতৃ আছে৷

কণ্ঠত মণিক পিন্ধিলা পাছে৷

ঘোড়াত চড়ি মহাৰঙ্গ মনে৷

মৃগক মাৰি ফুৰে বিজুবনে৷৷১৪১৬৷৷

দেখি সিংহে তাক নখে বিদাৰি৷

ঘোঁড়ায়ে সহিতে পেহ্লাইলা মাৰি৷৷

কণ্ঠৰ মণিক ছিণ্ডিয়া লই৷

চৰিল গিৰি শৃঙ্গে সিংহ গই৷৷১৪১৭৷৷

দেখি জাম্বৱন্ত বীৰ বিৰিঙ্গ৷

লৈলন্ত মণিক মাৰিয়া সিংহ৷৷

স্যমন্তক মণি গৰ্ত্তক নিলা৷

ওমলাইবে লাগি শিশুক দিলা৷৷১৪১৮৷৷

বিচিত্ৰ মণিগোট ধৰি ধাই৷

বাটত ফুৰে শিশু ওমলাই৷৷

কৃষ্ণৰ কিঙ্কৰে কহে শঙ্কৰে৷

বোলা হৰি হৰি সমস্ত নৰে৷৷১৪১৯৷৷