বসুদেৱ হেন শুনি৷

তবধ ভৈলন্ত গুণি৷৷

ৰুক্মিণী মূৰ্চ্ছিতা আতি৷

কান্দন্ত দৈৱকী সতী৷৷১৪৪৬৷৷

শোকে যায় প্ৰাণ ফুটি৷

ভূমিত পাৰন্ত লুটি৷৷

পুত্ৰ হৰুৱাওঁ জোনো৷

শ্যামল সুন্দৰ তনু৷৷১৪৪৭৷৷

পীতবস্ত্ৰে শোভে কায়৷

মেঘত বিজুলী প্ৰায়৷৷

মুখ চন্দ্ৰো নুহি সৰি৷

কমললোচন হৰি৷৷১৪৪৮৷৷

কৰ্ণত কুণ্ডল দোলে৷

বনমালা শোভে গলে৷৷

ভ্ৰমৰে নছাড়ে লোভে৷

শিৰত কিৰীটি শোভে৷৷১৪৪৯৷৷

কণ্ঠত কৌস্তুভ মণি৷

প্ৰভাতৰ সূৰ্য্য জিনি৷৷

একো অঙ্গে নুহি ৰুজ৷

আজানুলম্বিত ভুজ৷৷১৪৫০৷৷

কেয়ূৰ কঙ্কণে ৰঞ্জে৷

পদ-পঙ্কজক গঞ্জে৷৷

ৰত্নৰ নূপুৰ বাজে৷

মেখলা কটিৰ মাজে৷৷১৪৫১৷৷

কোটি কন্দৰ্পক জিনি৷

প্ৰকাশন্ত যদুমণি৷৷

হেন কৃষ্ণ মোৰ বাপ৷

এৰাওঁ কৈত তান তাপ৷৷১৪৫২৷৷

যতেক বান্ধৱ জ্ঞাতি৷

কৰন্ত বিলাপ আতি৷৷

সমস্ত নগৰী লোকে৷

কৰন্ত বিলাপ শোকে৷৷১৪৫৩৷৷

সত্ৰাজিত ধূমকেতু৷

তইসে নাশৰ হেতু৷৷

নাৰীগণে পাৰে গালি৷

সত্ৰাজিত পুত্ৰ খালি৷৷১৪৫৪৷৷

কৃষ্ণক কলঙ্ক দিয়া৷

এভু পাপী আছ জীয়া৷৷

দ্বাৰকাপুৰক ছানি৷

কৰে হাহাকাৰ ধ্বনি৷৷১৪৫৫৷৷

কৃষ্ণৰ কিঙ্কৰে ভণে৷

শুনিয়োক সৰ্ব্বজনে৷৷

কৃষ্ণৰ কীৰ্ত্তন কৰি৷

ডাকি বোলা হৰি হৰি৷৷১৪৫৬৷৷