নমো নমো মাধৱ বিধিৰ বিধিদাতা৷

তুমি জগতৰ গতি মতি পিতা মাতা৷৷

তুমি পৰমাত্মা জগতৰ ঈশ এক৷

একো বস্তু নাহিকে তোমাত ব্যতিৰেক৷৷৫১৯৷৷

তুমি কাৰ্য্য কাৰণ সমস্ত চৰাচৰ৷

সুৱৰ্ণ কুণ্ডলে যেন নাহিকে অন্তৰ৷৷

তুমি পশুপক্ষী সুৰাসুৰ তৰু তৃণ৷

অজ্ঞানত মূঢ়জনে দেখে ভিন্ন ভিন্ন৷৷৫২০৷৷

তোমাৰেসে মায়ায়ে মোহিত সৰ্ব্বক্ষণে৷

তুমি আত্মা তোমাক নজানে একোজনে৷৷৫৯

সমস্ত ভূতৰ তুমি আছা হৃদয়ত৷

তত্ত্ব নপাই তোমাক বিচাৰে বাহিৰত৷৷৫২১৷৷

তুমিসে কেৱল সত্য মিছা সৱে আন৷

জানি জ্ঞানীগণে কৰে হৃদয়ত ধ্যান৷৷

নবাঞ্ছোহো সুখভোগ নলাগে মুকুতি৷

তোমাৰ চৰণে মাত্ৰ থাকোক ভকতি৷৷৫২২৷৷

মুখে লৌক নাম মোৰ কৰ্ণে তৱ কথা৷

হৃদয়ত পাদপদ্ম থাকোক সৰ্ব্বথা৷৷

সজ্জনৰ সঙ্গ নুগুচোক সৰ্ব্বক্ষণে৷

এতেক প্ৰসাদ মাগো তোমাৰ চৰণে৷৷৫২৩৷৷

শুনা যি কাৰণে আইলো গোচৰ আমাৰ৷৷

দেখি আছো তোমাৰ অনেক অৱতাৰ৷৷

সম্প্ৰতি ধৰিলা প্ৰভু যেন নাৰীৱেশ৷

তাক দেখিবাক লাগি আইলো হৃষীকেশ৷৷৫২৪৷৷

যিটো নাৰীৱেশ ধৰি মুহিলা দানৱ৷৷

দেৱৰ অমৃত পান সাধিলা মাধৱ৷৷

সেহি নাৰীৱেশ দেখিবাক অভিলাষে৷

কৌতূহলে সভাৰ্য্যে আসিলো তযু পাশে৷৷৫২৫৷৷

ভৃত্য হেন জানি যদি মোক আছে দায়া৷

দেখায়ো আমাক কেনমত তিৰীমায়া৷৷

ভকতৰ মনোৰথ কৰিয়ো পূৰণ৷

হেন শুনি হাসি মাতিলন্ত নাৰায়ণ৷৷৫২৬৷৷

দৈত্যে নিলে অমৃত দেৱৰ দেখি ক্লেশ৷

সিকাৰণে শঙ্কৰ ধৰিলো নাৰীৱেশ৷৷

কামুকজনৰ তাত মহা কৌতূহল৷

তুমি মহাযোগীৰ দেখিবে কোন ফল৷৷৫২৭৷৷

ঘোৰ নাৰী-মায়া সৰ্ব্ব মায়াতে কুৎসিত৷

মহা সিদ্ধ মুনিৰো কটাক্ষে হৰে চিত্ত৷৷

দৰশনে কৰে তপ জপ যোগ ভঙ্গ৷

জানি জ্ঞানীগণে এড়ে কামিনীৰ সঙ্গ৷৷৫২৮৷৷

সিটো স্ত্ৰী-ৰূপক দেখিবা কোন কাজে৷

তুমি ভোল ভৈলে হাসিবেক সামৰাজে৷৷

এতেকেসে বোলো ক্ষমা কৰা পশুপতি৷

হেন শুনি হাসি হৰে হৰিত বদতি৷৷৫২৯৷৷

মহাযোগবলে শুদ্ধ কৰি আছো কায়া৷

ব্ৰহ্মময় দেখো কি কৰিতে পাৰে মায়া৷৷

দহি আছো মদনক আউৰ শঙ্কা নাই

মাধৱে মাতিলা হাসি শঙ্কৰক চাই৷৷৫৩০৷৷

দেখাইবো তোমাক আজি সেহি তিৰীবেশ৷

এহি বুলি অন্তৰ্দ্ধান ভৈলা হৃষীকেশ৷৷

আগত নাহিকে হৰি ভৈলা কোন ভিতি৷

চতুৰ্ভিতি চান্ত হৰে পাৰ্ব্বতী সহিতি৷৷৫৩১৷৷

বিদূৰক লাগি চান্ত উঠি হুয়া থিয়৷

চাপৰি চাহন্ত নেত্ৰ বলাই সদাশিৱ৷৷

উঠন্ত বৈসন্ত মাত্ৰ কৰে উসমিস৷

কৈক গৈল কৃষ্ণ একো নপান্ত উদ্দিশ৷৷৫৩২৷৷

এহিমতে চান্ত হৰে আকুলিত ভাৱে৷

ভণিল শঙ্কৰে গোৱিন্দৰ দুই পাৱে৷৷

শুনা সৰ্ব্বজনে মহাভাগৱত পদ৷

বোলা হৰি হৰি ডাকি ছাড়োক আপদ৷৷৫৩৩৷৷