গোপশিশু সঙ্গে গৈলা বঝাই৷

আগত গোধন বংশী বজাই৷৷

চাৰন্তে ফুৰন্তে গৰু গোৰক্ষ৷

পাইলা যমুনাৰ তীৰৰ লক্ষ্য৷৷৭৬২৷৷

কালিৰ হদক তাক নজানি৷

তৃষাত সৱে পিলা বিষপানী৷৷

দাৰুণ বিষৰ লাগিল জাল৷

মৰিল সৱে বৎস-বৎসপাল৷৷৭৬৩৷৷

দেখিয়া কৃষ্ণে অসন্তোষ পাইলা৷

অমৃত নয়নে চায়া জীয়াইলা৷৷

কালিক দমিবে কৰি যতন৷

কটিত বান্ধিলা পীত বসন৷৷৭৬৪৷৷

উঠিল উচ্চ কদম্বৰ গাছে৷

হ্ৰদৰ মাজে জাম্প দিলা পাছে৷৷

ঢউ উঠলিল খলকি হ্ৰদ৷

দশোদিশে গৈলা তাৰ শৱদ৷৷৭৬৫৷৷

জলক্রীড়া কৰা বাহু আস্ফালি৷

দেখি ক্রোধে খেদি আসিলা কালি৷৷

তনু সুকুমাৰ জলদ শ্যাম৷

প্ৰকাশে পীত বস্ত্ৰে অনুপাম৷৷৭৬৬৷৷

কমললোচন মুখ প্ৰসন্ন৷

মুকুতাৰ শাৰী সম দশন৷৷

উন্নত নাসা মুখে মন্দ হাস৷

কণ্ঠত কৌস্তভ কৰে প্ৰকাশ৷৷৭৬৭৷৷

হিয়াত জিলিমিলি কৰে কান্তি৷

মধ্যত জ্বলে শ্ৰীবৎসৰ পান্তি৷৷

আজানুলম্বিত বাহু দুখান৷

চাৰু উৰু কৰ কটি সুঠাম৷৷৭৬৮৷৷

জঙ্ঘা দুইক দেখি মিলে সন্তোষ৷

দুখানি পাৱ নৱ পদ্মকোষ৷৷

আনন্দে জলক ফুৰা আস্ফালি৷

মৰ্ম্মস্থলে আসি দংশিলা কালি৷৷৭৬৯৷৷

নজানি তোমাৰ বল প্ৰভাৱ৷

লাঞ্জে মেঢ়াইলেক সমস্ত গাৱ৷৷

বিষ লাগি পৰি থাকিলা ঘুমি৷

মনুষ্য চেষ্টাক দেখায়া তুমি৷৷৭৭০৷৷

দেখি শিশুসৱ মৰিল প্ৰায়৷

ধেনুগণে আউৰ তৃণ নখায়৷৷

কৃষ্ণক চাহিয়া থাকিল ৰহি৷

চক্ষুৰ লোহ ধাৰে যায় বহি৷৷৭৭১৷৷

আতি উতপাত দেখি গোকুলে৷

গোপগোপীজাক সমস্তে বোলে৷৷

জ্যেষ্ঠ বলভদ্ৰ লগে নগৈল৷

কৃষ্ণৰ আজি তৈতে কিবা ভৈল৷৷৭৭২৷৷

নন্দ যশোদা বিয়াকুল মনে৷

কৃষ্ণক চাহিবে পশিলা বনে৷৷

লগতে চলে গোপগোপীজাক৷

হা কৃষ্ণ বুলি চাড়ন্তে ডাক৷৷৭৭৩৷৷

ধ্বজ বজ্ৰ যৱ অঙ্কুশ চাই৷

কৃষ্ণৰ খোজ নিহালন্তে যায়৷৷

পুত্ৰ পুত্ৰ বুলি যশোদা চান্ত৷৷

কৃষ্ণৰ খোজত পৰন্তে যান্ত৷৷৭৭৪৷৷

বেঢ়িয়া গোপ-গোপী নেয় ধৰি৷

দেখিল পাচে পৰি আছে হৰি৷৷

জলৰ মাজে মৃতকৰ বেশ৷

নকৰন্ত আৰ চক্ষু নিমেষ৷৷৭৭৫৷৷

দেখি গোপ গোপী সম্যকে মৰিল৷

প্ৰাণ অন্তৰীক্ষ চেতন হৰিল৷৷

কৃষ্ণ কৃষ্ণ বুলি দিলেক গেড়ি৷

কান্দে যমুনাৰ তীৰক বেঢ়ি৷৷৭৭৬৷৷

যশোদা সুন্দৰী নন্দ গোৱালে৷

পৰন্ত লোটাৰি পৰি নিঢালে৷৷

কি ভৈল পুত্ৰ বুলি উকি দিয়া৷

দুহাতে ঝাৱলে ঢাকুৰে হিয়া৷৷৭৭৭৷৷

কৃষ্ণৰ সুন্দৰ বদন চাই৷

যশোদা কান্দন্ত গুণ বৰ্ণাই৷৷

গধূলি কোনে যাইবে বংশী বাই৷

কোনে মোক গৈয়া বুলিবে আই৷৷৭৭৮৷৷

ধূলা জাৰি কাক কৰাইবো স্নান৷

কোনে কৰিবেক গোৰস পান৷৷

কাক বিছাই দিবো শীতল তুলী৷

ডাকিবো কাক জাগা কৃষ্ণ বুলি৷৷৭৭৯৷৷

সুন্দৰ বদনে বজায়া বেণু৷

প্ৰভাতে কোনে চৰাইবেক ধেনু৷৷

কি ভৈল আজি কৃষ্ণ মোৰ বাপ৷৷

মৰিও নেৰাইবো তোৰ সন্তাপ৷৷৭৮০৷৷

এহি বুলি কান্দে কৃষ্ণক চাই৷

যশোদা নন্দে ঝাম্প দিবে যায়৷৷

দেখি বলভদ্ৰে বাধিলে হাসি৷

এখনে আসিব কালিক নাশি৷৷৭৮১৷৷

কৃষ্ণক লাগিয়া এৰা ক্রন্দন৷

হেন শুনি সৱে জুৰাইল মন৷৷

কৃষ্ণৰ কিঙ্কৰে শঙ্কৰে ভণে৷

বোলা হৰি হৰি সমস্ত জনে৷৷৭৮২৷৷