কেশীক বধিয়া আছন্ত হৰি৷

বৰিষে পুষ্প দেৱে স্তুতি কৰি৷৷

সেহিবেলা আসি নাৰদ ঋষি৷

কৃষ্ণক বুলিলা মহা হৰিষি৷৷১০২৫৷৷

হে কৃষ্ণ কৃষ্ণ প্ৰণামো আমি৷

সমস্ত ভূতৰ আতমা স্বামী৷৷

পুৰাণ পুৰুষ ঈশ্বৰ সাক্ষী৷

সমস্ত সৃষ্টিক আছাহা ৰাখি৷৷১০২৬৷৷

ভকতজনৰ ৰক্ষাৰ হেতু৷

দুষ্টক নাশিলা গৰুড়কেতু৷৷

কেশীবধ শুনি মিলিল ৰঙ্গ৷

হ্ৰেষণি শুনি দেৱে দেয় ভঙ্গ৷৷১০২৭৷৷

স্বৰ্গত থাকিবে নোৱাৰে কেৱ৷

কেশীক বধিয়া তাৰিলা দেৱ৷৷

প্ৰভাতে কালি মথুৰাক যাইবা৷

ধোবাক মাৰিয়া ধনু ভাঙ্গিবা৷৷১০২৮৷৷

চাণূৰ মুষ্টিক প্ৰমুখ্যে মাল৷

কুৱলয়পীড় হস্তী বিশাল৷৷

কংসক বধিবা জগত স্বামী৷

পৰশুই দিনা দেখিবো আমি৷৷১০২৯৷৷

কালযৱনক নৰকাসুৰ৷

মাৰিবাহা পঞ্চজন অসুৰ৷৷

কৰিবা বিহা কন্যা ভগৱন্ত৷

নৃগৰ শাপক কৰিবা অন্ত৷৷১০৩০৷৷

সত্যভামা সমে স্যমন্তমণি৷

পাইবা প্ৰভু জাম্বৱন্ত জিনি৷৷

মৃতক পুত্ৰক দিয়া বিপ্ৰক৷

লীলায়ে বধিবা নৃপ পৌণ্ড়্ৰক৷৷১০৩১৷৷

কেশীক বধি কৰি বুন্দামাল৷

মাৰিবা দন্তবক্র শিশুপাল৷৷

পাণ্ডৱৰ হাতে সমৰ জিনি৷

মৰাইবা অষ্টাদশ অক্ষৌহিণী৷৷১০৩২৷৷

কৰিবা কৰ্ম্ম যত দ্বাৰকাত৷

দেখিবো আনন্দে থাকি তথাত৷

কেৱল জ্ঞানমূৰ্ত্তি তুমি স্বামী ৷

তোমাত শৰণ পশিলো আমি৷১০৩৩৷৷

পৰম পুৰুষ সন্তৰ গতি৷

যদুশ্ৰেষ্ঠ হেৰা কৰো প্ৰণতি৷৷

আনন্দে নাৰদে এতেক কই৷

গৈলন্ত কৃষ্ণত মেলানি লই৷৷১০৩৪৷৷

গোৱিন্দো কেশী অসুৰক মাৰি৷

ব্ৰজৰ আনন্দ বঢ়ায়া হৰি৷৷

থাকিলা কৃষ্ণে নানা লীলা কৰি৷

সমস্ত সমাজে বুলিয়ো হৰি৷৷১০৩৫৷৷