গোপৰূপে নন্দৰ তনয়৷

শুভক্ষণে কৰিলা বিজয়৷৷

বাজে শিঙ্গা বাংশীৰ নিসান৷

কংস বধে কৰিলা পয়াণ৷৷১০৫১৷৷

ৰথে চড়ি লড়িলা মুৰাৰি৷

পৰি পৰি কান্দে গোপনাৰী৷৷

হৰিৰ বিৰহে দেহা তাৱে৷

যেন ভৈল বাতুল স্বভাৱে৷৷১০৫২৷৷

কৃষ্ণ কৃষ্ণ বুলি গেড়ি দেয়৷

আমাৰ প্ৰাণক কোনে নেয়৷৷

ত্ৰূৰ অত্ৰূৰ ভৈল বৈৰী৷

জীৱ কাঢ়ি নেয় কেন কৰি৷৷১০৫৩৷৷

কিনো হৰি নিদাৰুণ ভৈলা৷

গোকুল অনাথ কৰি গৈলা৷৷

কৃষ্ণ বিনে কি কৰে জীৱনে৷

আউৰ কোন যাইব বৃন্দাৱনে৷৷১০৫৪৷৷

প্ৰভাতে ৰাখিবে কোনে ধেনু৷

কোনে বাইবে সুললিত বেণু৷৷

কোনে চাইবে কটাক্ষে নিৰেখি৷

জুড়াইবে হৃদয় কাক দেখি৷৷১০৫৫৷৷

কোনে দিবে বাংশীৰ নিসান৷

কি দেখি ৰাখিবো আৱে প্ৰাণ৷৷

আমাৰ জীৱনে নাই সুখ৷

আউৰ নেদেখিবো কৃষ্ণমুখ৷৷১০৫৬৷৷

নীল আকুঞ্চিত যাৰ কেশ৷

শিৰে ৰত্ন কিৰীটি সুৱেশ৷৷

ভ্ৰূৱযুগ মদনৰ চাপ৷

দৰশনে হৰে হৃদি তাপ৷৷১০৫৭৷৷

ৰুচিকৰ কমল লোচন৷

সুধা সম মধুৰ বচন৷৷

সুষম ললাট গণ্ডস্থল৷

চাৰু কৰ্ণে মকৰ কুণ্ডল৷৷১০৫৮৷৷

নাসা তিল কুসুম সুন্দৰ৷

শোভে আতি অৰুণ অধৰ৷৷

দশন দাড়িম্ব বীজ পান্তি৷

হাস্যে নিন্দে চন্দ্ৰমাৰ কান্তি৷৷১০৫৯৷৷

কম্বু কণ্ঠে কৌস্তুভ প্ৰকাশে৷

সূৰ্য্য যেন উদিত আকাশে৷৷

সিংহবন্ধ স্কন্ধ সুপ্ৰসন্ন৷

ভুজযুগ ৰত্নৰ মোলান৷৷১০৬০৷৷

কেয়ূৰ কঙ্কণ তাতে জ্বলে৷

ৰত্নৰ গুলিয়া শোভে গলে৷৷

হিয়াত শ্ৰীবৎস কৰে কান্তি৷

যেন মেঘে বলাকাৰ পান্তি৷৷১০৬১৷৷

পীত বস্ত্ৰে শোভে তনু কালা৷

আপাদলম্বিত বনমালা৷৷

তাতে পৰি অনেক ভ্ৰমৰে৷

মধুলোভে বেঢ়িয়া গুঞ্জৰে৷৷১০৬২৷৷

বক্ষস্থলে মুকুতাৰ হাৰ৷

আকাশী গঙ্গাৰ যেন ধাৰ৷৷

ৰত্নৰ মেখলা কটি মাজে৷

সোণাৰ কিঙ্কিণী তাত বাজে৷৷১০৬৩৷৷

কৰিকৰ-ঊৰু নিৰুপম৷

চৰণ পঙ্কজ মনোৰম৷৷

ধ্বজ বজ্ৰ অঙ্কুশে অঙ্কিত৷

ৰত্নময় নূপুৰ ৰঞ্জিত৷৷১০৬৪৷৷

ভকতৰ হৃদয় ৰঞ্জন৷

নেদেখিবো সিহেন চৰণ৷৷

কন্দৰ্প কোটিকো ৰূপে জিনি৷

গোকুলে প্ৰকাশে যদুমণি৷৷১০৬৫৷৷

কহে কৃষ্ণ কিঙ্কৰে শঙ্কৰে৷

নাহি গতি কীৰ্ত্তনত পৰে৷৷

জানিয়া কৰিয়ো একচিত্ত৷

হৰি হৰি ঘোষা প্ৰতি নিত৷৷১০৬৬৷৷