গৈলন্ত নাৰদ ঋষি কংসৰ সমাজ৷

নিচিন্তি আছস কেনে এভু ভোজৰাজ৷৷

তোক মাৰিবাক লাগি দেৱৰ যতন৷

দৈৱকীৰ গৰ্ভে উপজিলা নাৰায়ণ৷৷১০৩৬৷৷

বসুদেৱে গোকুলত থৈলা চুৰি কৰি৷

নন্দঘৰে বাঢ়ন্ত তোমাৰ প্ৰাণবৈৰী৷৷

কৃত্যা কৰি আনি দিল নন্দৰ কন্যাক৷

কহিলো সম্ভেদ কথা দঢ়াই আপোনাক৷৷১০৩৭৷৷

শুনি কংসে খাণ্ডা তুলি উঠি গৈল ৰাগি৷

বসুদেৱ মহন্তক কাটিবাক লাগি৷৷

উঠি দেৱঋষি তাঙ্ক আনিলা নিৱাৰি৷

আঙ্ক নকাটিবি তঞি কৃষ্ণক নমাৰি৷৷১০৩৮৷৷

পিতৃ হত শুনি লাগ নেদিব তোমাকে৷

উলটি বসিল কংস নাৰদৰ হাকে৷৷

বসুদেৱ দৈৱকীক বান্ধিয়া নিহলে৷

কৰিলেক বন্দী উগ্ৰসেনক নিষ্খলে৷৷১০৩৯৷৷

পাছে দেৱঋষি গোকুলক গৈলা বহি৷

কৰিলা কৃষ্ণক স্তুতি আকাশত ৰহি৷৷

ভাৰ সংহাৰন্তা আউৰ নাহি তুমি বিনা৷

কংসক বধিবা প্ৰভু পৰশুই দিনা৷৷১০৪০৷৷

দিবা উগ্ৰসেনক কংসৰ ৰাজ্যভাৰ৷

বসুদেৱ দৈৱকীৰ খণ্ডিবা নিকাৰ৷৷

তোমাৰ মনুষ্য লীলা দেখিবো হৰিষি৷

এহি বুলি স্বৰ্গক গৈলেক দেৱঋষি৷৷১০৪১৷৷

অত্ৰূৰক পাঞ্চিলা ভোজৰ নিজ নাহা৷

কৃষ্ণক আনিবে তুমি গোকুলক যাহা৷৷

শিশু ধৰি তোমাৰে আমাৰে মিত্ৰৱতি৷

ইটো কাৰ্য্য সাধি মোক দিয়ো দানপতি৷৷১০৪২৷৷

শুনি দানপতিৰ আনন্দ ভৈল আতি৷

প্ৰভাতে লৰিলা মথুৰাত বঞ্চি ৰাতি৷৷

কৃষ্ণক দেখিবো আজি কিনো সুপ্ৰভাত৷

জানিলো প্ৰসন্ন ভৈলা বিধাতা আমাত৷৷১০৪৩৷৷

নয়নে দেখিবো মই চৰণ কমল৷

আজিসে জন্মৰ মোৰ হৈবেক সাম্ফল৷৷

দণ্ডৱতে পৰিবোহো কৃষ্ণৰ চৰণে৷

কৃষ্ণে মোক আশ্বাসিব মধুৰ বচনে৷৷১০৪৪৷৷

খুড়া বুলি কৃষ্ণে মোক কৰিবে আহ্লাদ৷

ব্ৰহ্মাৰ দুৰ্ল্লভ তেৱে লভিবো প্ৰসাদ৷

হেন মনে গুণি ৰথে চড়িলা অত্ৰূৰ৷

গধূলিকা বেলাত পশিলা গোপপুৰ৷৷১০৪৫৷৷

মাধৱৰ খোজচয় দেখিলা ভূমিত৷

ধ্বজ বজ্ৰ পঙ্কজ অঙ্কুশে সুশোভিত৷৷

ৰথৰ নামিয়া বেগে কৃষ্ণ কৃষ্ণ বুলি৷

শিৰে আনি ঘষিলা খোজৰ যত ধূলি৷৷১০৪৬৷৷

পাছে গৈয়া কৃষ্ণক দেখিল আনন্দতে৷

কৃষ্ণ কৃষ্ণ বুলিয়া পৰিল দণ্ডৱতে৷৷

কৃষ্ণে ধৰিলন্ত তাঙ্ক আঙ্কোৱালি তুলি৷

সতকাৰ কৰিলা অত্ৰূৰ খুড়া বুলি৷৷১০৪৭৷৷

অত্ৰূৰে ভকতি পথে যতেক বাঞ্ছিলা৷

কৃষ্ণো তান সৱে মনোৰথক পূৰিলা৷৷

কহিলন্ত অত্ৰূৰে কংসৰ বিচেষ্টাক৷

মথুৰাক যাইবাক সাজিল গোপজাক৷৷১০৪৮৷৷

শকটে উঠিয়া লড়ি নন্দ গোপৰাজ৷

ৰজনী প্ৰভাতে ৰাম কৃষ্ণ ভৈলা বাজ৷৷

কৃষ্ণক যাইবাৰ শুনি গোপী নিৰন্তৰ৷

মিলিল বিষাদ সৱে বজাইল গৃহৰ৷৷১০৪৯৷৷

সলোতক নয়নে মনত মহাদুঃখে৷

জুমাজুমি কৃষ্ণক চাহয় ঊৰ্দ্ধমুখে৷৷

কৃষ্ণৰ বিজয় কথা শুনা সাৱধানে৷

বোলা হৰি হৰি যাৱে প্ৰাণ থাকে মানে৷৷১০৫০৷৷