গোপীৰ শুনিয়া আকুল বাণী৷

ভৈলন্ত সদয় শাৰঙ্গপাণি৷৷

হাসিয়া বোলন্ত এৰিয়ো তাপ৷

গোপীক ক্রীড়িলা জগত বাপ৷৷৮৩৯৷৷

কৃষ্ণৰ সদয় দৃষ্টিক দেখি৷৷

প্ৰফুল্ল মুখ ভৈলা সৱে সখী৷৷

দৰশাই লীলা ভাৱ ভ্ৰূভঙ্গে৷

কৃষ্ণক চৌভিতি বেঢ়িলা ৰঙ্গে৷৷৮৪০৷৷

গোপীৰ মধ্যে শোভে দামোদৰ৷

তাৰাৰ মধ্যে যেন শশধৰ৷৷

গলত অম্লান পঙ্কজমালা৷

বেঢ়িয়া গুণ গাৱে গোপবালা৷৷৮৪১৷৷

আপুনি গাৱন্ত গীত মোহন৷

ফুৰন্ত ৰঞ্জি দিব্য বৃন্দাৱন৷৷

যমুনা বালি দেখি সুকোমল৷

পদ্ম-গন্ধি বাৱ আতি শীতল৷৷৮৪২৷৷

গোপীগণ লৈয়া নামিলা তাত৷

কৰিলা ক্রীড়া কৃষ্ণে অসংখ্যাত৷৷

বাহুমেলি কাকো আলিঙ্গি ধৰি৷

কাৰো স্তন নখে পৰশে হৰি৷৷৮৪৩৷৷

মুখ চায়া কাৰো তোলন্ত হাস৷

মাতন্ত কাকো কৰি পৰিহাস৷৷

লন্ত বস্ত্ৰ কাঢ়ি বঢ়ায়া ৰঙ্গ৷

বেকত কৰন্ত গুপুত অঙ্গ৷৷৮৪৪৷৷

ধৰিয়া কাৰো কণ্ঠে বাহু মেলি৷

কৰিলা অনেক অনঙ্গ কেলি৷৷

আনন্দে গোপীৰ বঢ়ায়া কাম৷

ৰমিলা গোপীনাথ অৱিশ্ৰাম৷৷৮৪৫৷৷

কৃষ্ণত হন্তে মহামান পায়া৷

বুলিলা গৰ্ব্বে সৱে গোপজায়া৷৷

আমাৰ সম সুভাগিনী নাই৷

ভৈলন্ত অধীৰ যাদৱৰায়৷৷৮৪৬৷৷

গোপীৰ মহা অহম্মম ভাৱ৷

দেখি নসহিলা কৃষ্ণৰ গাৱ৷৷

তাসম্বাৰ দৰ্প্প হৰিবে মনে৷

ভৈলা অন্তৰ্দ্ধান তৈতে তেখনে৷৷৮৪৭৷৷

কৃষ্ণক নপাই পাছে গোপীচয়৷

মিলিল সন্তাপ ভৈলন্ত ভয়৷৷

যেন যূথপক নেদেখি বনে৷

কান্দে আৰ্ত্তৰাৱে হস্তিনীগণে৷৷৮৪৮৷৷

কৃষ্ণৰ সদয় কটাক্ষ হাসে৷

মোহন আলাপ গতি বিলাসে৷৷

হৰিল চিত্ত পাসৰিল মৰ্ম্ম৷

কৰিবে লাগিল কৃষ্ণৰ কৰ্ম্ম৷৷৮৪৯৷৷

কৃষ্ণৰ থানে কৰে লীলাগতি৷

সদয় হাস্যে চাৱে কাকো প্ৰতি৷৷

মইসে কৃষ্ণ দেখ গোপীগণ৷

অন্যোঅন্যে গোপী বোলে বচন৷৷৮৫০৷৷

একত্ৰ হুয়া মহাপ্ৰেমভাৱে৷

গোৱিন্দ গুণ গাৱে আৰ্ত্তৰাৱে৷৷

বিচাৰি ফুৰে সিটো বৃন্দাৱনে৷

কৃষ্ণ কৃষ্ণ বুলি উন্মত্ত মনে৷৷৮৫১৷৷

যিটো হৰি আছা জগত ব্যাপি৷

বৃক্ষত তাঙ্ক সোধে পাশ চাপি৷৷

কৃষ্ণৰ কিঙ্কৰে শঙ্কৰে ভণে৷

বোলা হৰি হৰি সমস্তজনে৷৷৮৫২৷৷