শৰত কালে চন্দ্ৰাৱলী ৰাতি৷

দিব্য ৰাসক্রীড়া কৰিলা আতি৷৷

পঞ্চম ৰাগে গাইলা গীত হৰি৷

শুনি মোহ ভৈলা গোপ সুন্দৰী৷৷১০০৮৷৷

ঘৰবাৰী এৰি লৱৰে ভোলে৷

স্তন হলফল কুণ্ডল দোলে৷৷

বাইলাহা বাংশী পশি বৃন্দাৱনে৷

চৌপাশে বেঢ়ি নাচে গোপীগণে৷৷১০০৯৷৷

জয় কৃষ্ণ বুলি বাৱে চাপৰি৷

গোপীৰ মধ্যে প্ৰকাশন্ত হৰি৷৷

যেহেন সুৱৰ্ণ মণি মাজত৷

প্ৰকাশি আছে মহা মৰকত৷৷১০১০৷৷

দোহো গোপী মাজে এক গোপাল৷

নূপুৰ বাদ্য ভৰি কৰতাল৷৷

হাতত হাতে ধৰি গোপনাৰী৷

নাচিলা অনঙ্গ ৰঙ্গে মুৰাৰি৷৷১০১১৷৷

সজল মেঘ মাধৱৰ কায়৷

গোপীগণ ভৈল বিজুলী প্ৰায়৷৷

অলঙ্কাৰে কৰে মধুৰ ঘোষ৷

শুনিয়া মনত মিলে সন্তোষ৷৷১০১২৷৷

গোপীৰ গলে ধৰি বাহু মেলি৷

কৰিলা অনেক অনঙ্গ কেলি৷৷

শ্ৰম দেখি কতো আঞ্চলে বিঞ্চে৷

যমুনা জলে নামি জল সিঞ্চে৷৷১০১৩৷৷

পূৰিল গোপীগণ মনোৰথ৷

ক্রীড়া দেখি চন্দ্ৰো ৰাখিল ৰথ৷৷

মোহিত ভৈল যত দিব্য নাৰী৷

ৰাখিলা গোপীক যক্ষক মাৰি৷৷১০১৪৷৷

ধায়া আসিলেক অৰিষ্ট বীৰ৷

মেদিনী নসহে খুৰাৰ ভিৰ৷৷

দেখি আস্ফালিলা শিঙত ধৰি৷

তাৰো প্ৰাণ লৈলা ঘাৰ মুচৰি৷৷১০১৫৷৷

খেদি অসিলেক কেশী অসুৰ৷

হ্ৰেষণি শুনি কাম্পে গোপপুৰ৷৷

লাঞ্জৰ ছাটিত মেঘ উড়াই৷

দেখিয়া প্ৰভু তাক গৈলা ধাই৷৷১০১৬৷৷

পাছে চণ্ড বেগে অসুৰ আসি৷

হানিলেক লাথি ভৰি উল্লাসি৷৷

এৰাইলা তাক শ্ৰম কৰি হৰি৷

আছাৰি পেহ্লাইলা পাৱত ধৰি৷৷১০১৭৷৷

আসিল কেশী দুনাই বেন্ত বাই৷

বাম বাহু তাৰ মুখে ভৰাই৷৷

বঢ়াইলা প্ৰভু আতি বৰ বেগে৷

ভেণ্টিল গল যেন গৰ্ভৰোগে৷৷১০১৮৷৷

ভূমিত পৰিল চেতন হৰি৷

চক্ষু ওলটায়া আছাড়ে ভৰি৷৷

মৰিল অসুৰ ছাদি ৰুধিৰ৷

বাজ ভৈল বাহু ফাটি শৰীৰ৷৷১০১৯৷৷

কেশী বধ দেখি হাসি হৰিষে৷

ব্ৰহ্মা আদি দেৱে পুষ্প বৰিষে৷৷

কংসৰ বোলে যত দৈত্য আসে৷

মৰে অগ্নিত যেন পতঙ্গ ঝাসে৷৷১০২০৷৷

এহিমতে সৱে অসুৰ মাৰি৷

ফুৰিলা বৃন্দাৱনে গৰু চাৰি৷৷

গোধূলি পড়ি ৰঞ্জে মুখ আখি৷

মাথাত পিন্ধিলা মৈৰাৰ পাখি৷৷১০২১৷৷

গুঞ্জাৰ থোপাক কাণত আৰি৷

কাষত লৈয়া শিঙা বেত বাড়ি৷৷

মোহন বাংশী বেৰটিত থই৷

ব্যঞ্জন ভাত বাম হাতে লই৷৷১০২২৷৷

ভোজন কৰা তুমি যদুৰাজে৷

বসিয়া ৰঙ্গে গোপশিশু মাজে৷৷

কোনে বুজিবেক তোমাৰ লীলা৷

কটাক্ষে ভূমিৰ ভাৰ হৰিলা৷৷১০২৩৷৷

কৃষ্ণৰ কিঙ্কৰে শঙ্কৰে ভণে৷

গোপালকেলি শুনা সৰ্ব্বজনে৷৷

মোক্ষ পাইবা যেৱে সংসাৰ তৰি৷

সঘনে ডাকি বোলা হৰি হৰি৷৷১০২৪৷৷