দেখ সখী খোজে কোন জনী যায় সঙ্গে৷

কৃষ্ণৰ কান্ধত হাত দিয়া লীলা ৰঙ্গে৷৷

নিশ্চয়ে জানিলো আৰাধিলে দেৱ হৰি৷

তাইক লগে নেন্ত আমি সমস্তকে এৰি৷৷৮৭৫৷৷

দেখা সখীসৱ ধন্য কৃষ্ণপদধূলি৷

ব্ৰহ্মা হৰে শিৰে ধৰে শুদ্ধ হঞো বুলি৷৷

আসা আমি কৰো এহি ধূলা অভিষেক৷

দেখিবো পৱিত্ৰ হুয়া কৃষ্ণক প্ৰত্যেক৷৷৮৭৬৷৷

আৰ জনী বোলে কিবা কহ গোপীগণ৷

তাইৰ খোজ দেখিয়া আকুল কৰে মন৷৷

কৃষ্ণৰ অধৰামৃত সৰ্ব্বস্ব সৱাৰে৷

চুৰি কৰি নিয়া তাই ভুঞ্জে একেশ্বৰে৷৷৮৭৭৷৷

আৱে ঐত তাইৰ খোজ নাকলিয়া ভালে৷

তৃণে বিন্ধিলেক সুকোমল ভৰিতলে৷৷

প্ৰাণতো অধিক প্ৰিয়া দুখ পাৱে বুলি৷

কোলাত লৈয়া যান্ত আলগাই তুলি৷৷৮৭৮৷৷

গোপীক বহন্ত কিনো কামাতুৰ হৰি৷

দেখা দেখা ঐত পোত গৈয়া আছে ভৰি৷৷

ঐত নমাই থৈলন্ত প্ৰিয়াক মহাশয়৷

দেখা তাইৰ অৰ্থে আনিলন্ত পুষ্পচয়৷৷৮৭৯৷৷

পৰিল গেডুৱা চড়াই ফুল ভৰি ফান্দি৷

অৰ্দ্ধেক ভৰিৰ খোজ হেৰা আছে বান্ধি৷৷

হেৰা দেখা তাইক ঐত উৰুত বৈসাই৷

বান্ধিলন্ত খোপা কামাতুৰ যদুৰায়৷৷৮৮০৷৷

আৰিলা খোপাত তাইৰ ফুল চতুৰ্ভিতি৷

দেখা আছিলন্ত বসি গোপিকা সহিতি৷৷

শুক নিগদতি ৰাজা শুনিও শ্ৰৱণে৷

পূৰ্ণকাম হৰি ক্রীড়িলন্ত যি কাৰণে৷৷৮৮১৷৷

দেখাইলন্ত দুঃখ কামাতুৰ পুৰুষৰ৷

স্ত্ৰীৰো দুৰ্জ্জন ভাৱ শুনা আতপৰ৷৷

চলি যায় যিটো গোপী কৃষ্ণৰ লগত৷

মহাগৰ্ব্বভাৱ তাইৰ বাঢ়িল মনত৷৷৮৮২৷৷

কৃষ্ণক আশায়ে আইলা যত গোপীজাক৷

সৱাকো এৰিয়া কৃষ্ণে ভজিলা আমাক৷৷

সমস্তে নাৰীত শ্ৰেষ্ঠ আপুনাক মানি৷

মহাদৰ্পে কৃষ্ণক বুলিলা হেন বাণী৷৷৮৮৩৷৷

চলিতে নপাৰো আৰ মই এক ভৰি৷

যৈকে মন নিয়া আৱে যেন লাগে কৰি৷৷

শুনি হেন হৰিয়ো বুলিলা তাইক হাসি৷

যাইবে যেৱে নপাৰা কান্ধত উঠা আসি৷৷৮৮৪৷৷

শুনি উঠিবাক তাই গৈল কাছিপাৰি৷

দেখি অন্তৰ্দ্ধান ভৈলা তথাতে মুৰাৰি৷৷

কান্দে আৰ্ত্তৰাৱে গোপী কৃষ্ণক নেদেখি৷

হা নাথ কৈক গৈলা হামাক উপেক্ষি৷৷৮৮৫৷৷

তোমাৰেসে দাসী মই জানা নাৰায়ণ৷

অনাথৰ নাথ মোক দিয়া দৰিশন৷৷

গোপীগণে গোৱিন্দৰ খোজ নেই গুড়ি৷

সমীপতে দেখে স্ত্ৰী কান্দে দুঃখে পৰি৷৷৮৮৬৷৷

সমস্তে সখীতে তাই কহিল বৃত্তান্ত৷

যেন মতে তাইক এড়িলন্ত কৃষ্ণকান্ত৷৷

শুনিয়া বিস্ময় আতি ভৈলা যত সখী৷

নিৱৰ্ত্তিলা সৱে ঘোৰ অন্ধকাৰ দেখি৷৷৮৮৭৷৷

কৃষ্ণতে অৰ্পিল মন কৃষ্ণৰে আলাপ৷

কৃষ্ণগুণ গায়া কৰে কৃষ্ণৰে বিলাপ৷৷

পতি পুত্ৰ গৃহ শৰীৰকো নুসুমৰে৷

কৃষ্ণময় হুয়া কৃষ্ণচেষ্টা মাত্ৰ কৰে৷৷৮৮৮৷৷

কৃষ্ণপদ পঙ্কজে নিবিড় কৰি চিত্ত৷

দুনাই যমুনাৰ সৱে নামিলা বালিত৷৷

কৃষ্ণক প্ৰাৰ্থয় গোপী এক ঠাই হুই৷

বোলা হৰি লাগোক পাপৰ মুণ্ডে জুই৷৷৮৮৯৷৷