উদ্ধৱে কৃষ্ণৰ শুনি বাণী৷

কৃতাঞ্জলি ভৈলা মহামানী৷৷

মাতিবে নৱাৰি আছে ৰহি৷

চক্ষুৰ লোতক পৰে বহি৷৷১৮৩০৷৷

স্নেহত আকুল কৰে মন৷

ধৈৰ্য্য ধৰি ভৈলা সন্ধুক্ষণ৷৷

আগবাঢ়ি গৈলা ধীৰে ধীৰে৷

কৃষ্ণৰ চৰণ ছুই শিৰে৷৷১৮৩১৷৷

বুলিলা কৰিয়া নমস্কাৰ৷

গুচাইলা মোহ অন্ধকাৰ৷৷

সূৰ্য্যৰ কাছত যিটো থাকে৷

তাক কি আন্ধাৰে আৰ ঢাকে৷৷১৮৩২৷৷

কিনো কৃপা ভৃত্যক কৰিলা৷

বিজ্ঞান প্ৰদীপ মোক দিলা৷৷

প্ৰভু এৰি তোমাৰ পাৱক৷

কোনজনে ভজিবে আনক৷৷১৮৩৩৷৷

ছিণ্ডিলা সুদৃঢ় মোহপাশ৷

বিষয়ত কৰিলা উদাস৷৷

দূৰ ভৈল বান্ধৱৰ স্নেহ৷

দেখো ভিন্ন আপুনাৰ দেহ৷৷১৮৩৪৷৷

নমো নমো যোগেশ্বৰ হৰি৷

ভৃত্যক শিখায়ো ভাল কৰি৷৷

মুক্ত অৱস্থাতো মোৰ মন৷

নেৰো যেন তোমাৰ চৰণ৷৷১৮৩৫৷৷

মাধৱে বোলন্ত এহি হৌক৷

বদাৰিকাশ্ৰমক যায়োক৷৷

অলকানন্দাক দৰশনে৷

এৰিবে সমস্ত পাপগণে৷৷১৮৩৬৷৷

পিন্ধিবাহা বাকলি বসন৷

বন্যফল কৰিবা ভোজন৷৷

থাকিবাহা ইন্দ্ৰিয়ক দমি৷

হৈবা শান্ত মনক নিয়মি৷৷১৮৩৭৷৷

আমাক স্মৰিবা বাক্যমনে৷

মোৰ ৰূপ চিন্তিবা যতনে৷৷

সংসাৰৰ বন্ধে হৈবা হীন৷

তেৱে চিত্ত মোতে যাইবা লীন৷৷১৮৩৮৷৷

যিটো জ্ঞান শিখাইলো তোমাক৷

বিচাৰিয়া অভ্যাসিবা তাক৷৷

পাইবা তাৰ অল্পতে প্ৰমাণ৷

এতিক্ষণে এৰা ইটো স্থান৷৷১৮৩৯৷৷

তৰিবাহা সংসাৰৰ ক্লেশ৷

দিবাহা লোকক উপদেশ৷৷

ভণিল শঙ্কৰে কৃষ্ণ পদে৷

হৰি হৰি বোলা সভাসদে৷৷১৮৪০৷৷