শুনা সখি যেন ভৈল অৱস্থা৷

পূৰ্ব্বাপৰ কহো কৃষ্ণৰ কথা৷৷

খণ্ডিবাক লাগি ভূমিৰ ভাৰ৷

দেৱকী গৰ্ভে ভৈলা অৱতাৰ৷৷১৯৮৯৷৷

বসুদেৱে ভয়ে গোকুলে থৈলা৷

কৰিলা কৃষ্ণে তৈতে শিশুলীলা৷৷

গোপশিশু সমে বাছুৰি চাৰি৷

ভ্ৰমন্ত যমুনা তীৰে মুৰাৰি৷৷১৯৯০৷৷

কংসে পাঞ্চে যত আসে দানৱ৷

লীলায়ে মাৰন্ত তাক মাধৱ৷৷

ইন্দ্ৰৰ মখকো কৰিলে ভঙ্গ৷

বৰষিলে ইন্দ্ৰে কৰিয়া খঙ্গ৷৷১৯৯১৷৷

মন্দৰ তুলি পাছে ভগৱন্তে৷

ৰাখিলা ব্ৰজক বৃষ্টিৰ হন্তে৷৷

শৰত কালে চন্দ্ৰাৱলী পাই৷

কৰিলা ৰাসক্রীড়া যদুৰায়৷৷১৯৯২৷৷

বলো সমে আসি মথুৰাপুৰ৷

মাৰিলা তৈতে দুষ্ট কংসাসুৰ৷৷

পঢ়িবে লাগি গৈলা হুয়া ছাত্ৰ৷

সান্দীপনি গুৰু পঢ়াইলা শাস্ত্ৰ৷৷১৯৯৩৷৷

মৃতক পুত্ৰক দক্ষিণা দিলা৷

অষ্ট মহিষীক হৰি বিহাইলা৷৷

নৰক মাৰি ৰূপে গুণে ধন্যা৷

পাইলা আৰো ষোল হাজাৰ কন্যা৷৷১৯৯৪৷৷

সৱাতো দদশ পুত্ৰ জাত৷

ভৈল বল বীৰ্য্যে জগতে খ্যাত৷৷

দ্বিবিদ মাগধ সম্বৰ বাণ৷

শাল্ব পৌণ্ড্ৰকৰ লৈলন্ত প্ৰাণ৷৷১৯৯৫৷৷

পাণ্ডৱৰ হাতে সমৰজিনি৷

মৰাইলা অষ্টাদশ অক্ষৌহিণী৷৷

উত্তৰাৰ গৰ্ভে ভৈলা উতপতি৷

পৰীক্ষিত পাণ্ডুবংশ সন্ততি৷৷১৯৯৬৷৷

দ্ৰৌণিৰ অস্ত্ৰে দহিলেক গাক৷

ৰাখিলন্ত কৃষ্ণে ধৰি গদাক৷৷

কৃষ্ণৰ মহা অনুগ্ৰহ পাই৷

ভুঞ্জিলা ৰাজ্য যুধিষ্ঠিৰ ৰায়৷৷১৯৯৭৷৷

অনেক বৎসৰ আছে মাধৱ৷

যাদৱগণৰ বঢ়াই উৎসৱ৷৷

গৃহত পাছে ভৈলা বিৰকতি৷

গুণন্ত মনত জগতপতি৷৷১৯৯৮৷৷

আছে যদুগণ দুঃসহ বীৰ৷

নুগুচিল কিছু ভাৰ ভূমিৰ৷৷

দিয়াইলা বিপ্ৰশাপ প্ৰভু ছলে৷

সৱাকো নিলা প্ৰভাসৰ জলে৷৷১৯৯৯৷৷

স্নান কৰি সৱে দিলেক দান৷

কৰিলে বাৰুণী সুৰাক পান৷৷

কৃষ্ণৰ মায়াত চেতন হৰিল৷

অন্যোঅন্যে যুজি সৱে মৰিল৷৷২০০০৷৷

মাধৱো পাছে স্নান কৰি জ্বলে৷

বসিলা আসনে অশ্বত্থতলে৷৷

মোক আদেশিলা জগত নাহা৷

তুমি বদৰিকাশ্ৰমক যাহা৷৷২০০১৷৷

তথাপি এৰিবে নৱাৰো স্বামী৷

আঁৰ হুয়া ৰৈলো পাছতে আমি৷৷

কৃষ্ণৰ বিৰহ সহিবে কোনে৷

বোলা হৰি হৰি সমস্ত জনে৷৷২০০২৷৷