শুকমুনি বদতি শুনিয়ো পৰীক্ষিত৷

পাপৰ অন্তক ইটো কৃষ্ণৰ চৰিত৷৷

এহিমতে মৰিল যতেক যদুজাক৷

অনন্তৰে দাৰুক গৈলন্ত দ্বাৰকাক৷৷১৯১৫৷৷

গোৱিন্দৰ বিয়োগ বিহ্বল আতি দুঃখে৷

চাই আছে নৰনাৰী কৰি উৰ্দ্ধমুখে৷৷

বসুদেৱ উগ্ৰসেনো আছে দুঃখভাৱে৷

পৰিল দাৰুক গৈয়া দুহান্তৰো পাৱে৷৷১৯১৬৷৷

চক্ষুৰ লোতকে তিয়াইলন্ত দুইৰো ভৰি৷

কান্দিলা অনেক ৰাম কৃষ্ণক সুমৰি৷৷

দাৰুকক বেঢ়িয়া সোধন্ত নাৰী নৰে৷

কি ভৈল সাৰথি কথা কহিয়ো সত্বৰে৷৷১৯১৭৷৷

মুচিলন্ত আখি আতি গদগদ মাত৷

কহিলা দাৰুকে পাছে সকল বৃত্তান্ত৷৷

কি কহিবো কথা মোৰ দহয় হৃদয়৷

অন্যোঅন্যে যদুগণ গৈল যমালয়৷৷১৯১৮৷৷

নৰৈল জনৈক নিৰন্তৰে ভৈলা হত৷

হেন শুনি অগ্নি যেন লাগিল গাৱত৷৷

ক্রন্দনৰ উৰ্মি উথলিল আতি বৰ৷

প্ৰভাসক লাগি সৱে দিলেক লৱৰ৷৷১৯১৯৷৷

গালত চাপৰ মাৰে শোকে শ্ৰুতি নাই৷

হা পতি পুত্ৰ বুলি গেৰিয়ান্তে যাই৷৷

এহিমতে গৈয়া সৱে দেখিলন্ত পাছে৷

প্ৰভাসৰ তীৰক মৃতকে বেঢ়ি আছে৷৷১৯২০৷৷

মৰা পতি পুত্ৰ সোদৰৰ গলে ধৰি৷

কান্দে নাৰীগণে আতি আৰ্ত্তৰাৱ কৰি৷৷

মহাশোকে বসুদেৱ দৈৱকী ৰোহিণী৷

বলোভদ্ৰ কৃষ্ণক চাহন্তে ফুৰে তিনি৷৷১৯২১৷৷

নপাইলন্ত লাগ খুজি কৰিয়া বিচাৰ৷

হৰাইল চেতন শোকে দেখে অন্ধকাৰ৷৷

তিনিয়ো তেজিলা প্ৰাণ কৃষ্ণ কৃষ্ণ বুলি৷

মাটিত উফৰি পৰি মৰিল সমূলি৷৷১৯২২৷৷

ক্রন্দন এৰিয়া নাৰীগণ অসংখ্যাত৷

স্বামীক আলিঙ্গি আৰোহিলন্ত চিতাত৷৷

ৰেৱতী প্ৰমুখ্যে আছে যত নাৰীগণ৷

ৰামক আলিঙ্গি প্ৰৱেশিলা হুতাশন৷৷১৯২৩৷৷

কৃষ্ণ মাতৃগণে বসুদেৱক আৱৰি৷

চিতাত উঠিয়া সৱে গৈলন্ত সৈতাৰি৷৷

ৰতি আদি মাধৱৰ পুত্ৰ-বধূ যত৷

গৈলা সৱে স্বকী স্বকী স্বামীৰ লগত৷৷১৮২৪৷৷

ৰুক্মিণী প্ৰমুখ্যে অষ্ট মহিষী কৃষ্ণৰ৷

নপাইল বিচাৰি মাধৱৰ কলেৱৰ৷৷

প্ৰৱেশিলা বহ্নিত স্বামীক কৰি ধ্যান৷

কৃষ্ণক চিন্তিয়া সৱে এৰিলন্ত প্ৰাণ৷৷১৯২৫৷৷

এহিমতে এৰি যেৱে গৈলা দামোদৰে৷

ক্ষণেকতে দ্বাৰকাক বুৰাইলা সাগৰে৷৷

নৰহিল কিছু তল গৈল সামৰাজে৷

ৰুক্মিণীদেৱীৰ মুখ্য মন্দিৰত বাজে৷৷১৯২৬৷৷

নেৰন্ত যাহাক মধুসূদনে ক্ষণেক৷

অদ্যাপিও সাগৰত দেখিয় প্ৰত্যেক৷৷

সূৰ্য্য সম জ্বলে সিটো কৃষ্ণৰ আলয়৷

যাক দৰশনে কৰে পাপৰ প্ৰলয়৷৷১৯২৭৷৷

কৃষ্ণৰ নিৰ্য্যাণ শুনিয়োক সৰ্ব্বজনে৷

তৰিবা সংসাৰ আৰ শ্ৰৱণ কীৰ্ত্তনে৷৷

গৃহতে থাকিয়া সুখে মহাপুণ্য সাঞ্চা৷

বোলা হৰি হৰি যম যাতনাক বঞ্চা৷৷১৯২৮৷৷