ব্ৰহ্মায়ে বোলন্ত শুনিয়ো কথা৷

যি কাৰ্য্যে প্ৰতিমা নাছিল তথা৷৷

পূৰ্ব্বত মেৰুৰ শিখৰে হৰি৷

বসিয়া আছন্ত আনন্দ কৰি৷৷২৫ ৷৷

প্ৰণামি জানুশিৰে লক্ষ্মী মাৱে৷

কৰিলন্ত প্ৰশ্ন স্বামীৰ পাৱে৷৷

কোন কৰ্ম্মভূমি মনুষ্য লোকে৷

সদায়ে আক নেৰে দুঃখে শোকে৷৷২৬ ৷৷

কোন কৰ্ম্মে পাৱে সংসাৰ পাৰ৷

কহিয়ো মোত কিবা ধৰ্ম্ম সাৰ৷৷

কৰুণা আছে দাসী বুলি যদি৷

গুচায়ো আমাৰ সংশয় ছেদি৷৷২৭ ৷৷

মাধৱে বোলন্ত শুনিয়ো প্ৰিয়া৷

আমাৰ কথাত কৰিয়ো হিয়া৷৷

আছে মহাক্ষেত্ৰ কৈলো তোমাত৷

পুৰুষোত্তম নামে ঠাই প্ৰখ্যাত৷৷২৮ ৷৷

সংসাৰক তৰে তাত নিৱাসে৷

হোৱয় সিদ্ধি আতি অপ্ৰয়াসে৷৷

কীৰ্ত্তনতে যাৰ পাপ পলাই৷

তিনিয়ো লোকে তাৰ সম নাই৷৷২৯ ৷৷

নজানে তাক দেৱ সিদ্ধ মুনি৷৷

গুপুত কৰিয়া আছো আপুনি৷৷

আজিসে তোমাত কৰো বেকত৷

শুনা সাৱধানে তাৰ মহত্ত্ব৷৷৩০৷৷

ব্ৰহ্মাক মহাপ্ৰলয়ৰ অন্তে৷

স্ৰজিলো নাভিকমলৰ হন্তে৷৷

উপজি মোতে পাছে সৃষ্টিকৰে৷

স্ৰজিল চৰাচৰ নিৰন্তৰে৷৷৩১ ৷৷

জগত নিৰ্ম্মিয়া কৰিলা ধ্যান৷

তেখনে তান ভৈলো বিদ্যমান৷৷

সজল মেঘ শৰীৰৰ কান্তি৷

হিয়াত প্ৰকাশে শ্ৰীবৎসপান্তি৷৷৩২ ৷৷

তনুক ৰঞ্জে আতি পীত বস্ত্ৰ৷

হাতত চক্র ধৰি আছো অস্ত্ৰ৷৷

কমললোচন মুখ প্ৰসন্ন৷

দেখি ব্ৰহ্মা উঠি দিলা আসন৷৷৩৩ ৷৷

অক্ষতে অৰ্ঘ্যে পূজি প্ৰজাপতি৷

কৰিলা আমাক অনেক স্তুতি৷৷

ব্ৰহ্মাক পাছে দিলো সমিধান৷

কি কাৰ্য্যে আমাক কৰিলা ধ্যান৷৷৩৪ ৷৷

হেন শুনি ব্ৰহ্মা মাতিলা পাছে৷

কোন মুখ্য সাধ্য লোকৰ আছে৷৷

বিনা যজ্ঞ যোগ ব্ৰত নিয়ম৷

নকৰি তপ তীৰ্থ পৰিশ্ৰম৷৷৩৫ ৷৷

পাইবেক মহাসিদ্ধি অপ্ৰয়াসে৷

কহিয়ো আমাত জগনিৱাসে৷৷

কোন বা উত্তম ক্ষেত্ৰ তোমাৰ৷

বোলা হৰি হৰি তৰা সংসাৰ৷৷৩৬ ৷৷