হেন শুনি দিলো পাছে ব্ৰহ্মাক উত্তৰ৷

ব্ৰহ্মৰ ক্ষেত্ৰৰ কথা শুনি সৃষ্টিকৰ৷৷

জগততে কৰি মই যিহেতু উত্তম৷

সি কাৰণে নাম মোৰ পুৰুষোত্তম৷৷৩৭ ৷৷

ভৈলো সিটো ক্ষেত্ৰে মই আপুনি সাক্ষাত৷

পুৰুষোত্তম নামে ক্ষেত্ৰ তাতেসে প্ৰখ্যাত৷৷

বিনা যজ্ঞ দান তপ যোগৰ যুগুতি৷

চাৰিও বৰ্ণক দেয় ভুকুতি মুকুতি৷৷৩৮ ৷৷

সিটো মহাক্ষেত্ৰ দশ যোজন প্ৰকট৷

দক্ষিণ সাগৰ তীৰে আছে সিদ্ধ বট৷৷

যাৰ ছায়া পৰশনে হোৱে মহোদয়৷

দৰশন মাত্ৰে ব্ৰহ্মহত্যা হোৱে ক্ষয়৷৷৩৯ ৷৷

প্ৰদক্ষিণ কৰি যিটো কৰে নমস্কাৰ৷৷

মোৰ স্থান পাৱে কৰি পুৰুষ উদ্ধাৰ৷৷

প্ৰলয়তো নাহি সিটো বটৰ বিনাশ৷

সেই থানে বটৰ উত্তৰ দিশপাশ৷৷৪০৷৷

দিব্য দৌল আছে তাৰ কি কৈবো মহিমা৷

বৈদূৰ্য্যৰ আছে তাত আমাৰ প্ৰতিমা৷৷

অপ্ৰয়াসে তাকে চাই পাৱে মহোদয়৷

পাপী নৰো চলি যায় বিষ্ণুৰ নিলয়৷৷৪১ ৷৷

হেন জানি যম ৰাজা কৰিলা গমন৷

বটৰ নিকটে মোক পাইলা দৰিশন৷৷

প্ৰণামিয়া শিৰে বুলিলন্ত স্তুতিবাণী৷

নমো নমো জগন্নাথ দেৱ চক্রপাণি৷৷৪২ ৷৷

নমো নমো জ্যোতিঃফল দেৱ সনাতন৷

সৰ্ব্বব্যাপী পুৰুষ পৰম নিৰঞ্জন৷৷

বহুবিধ স্তুতি কৰি কৰন্ত প্ৰণাম৷

মই বোলো যম কহ সাধো কোন কাম৷৷৪৩ ৷৷

যম ৰাজা বোলে ইটো ক্ষেত্ৰ মাজে সাৰ৷

ইন্দ্ৰনীলময় আত প্ৰতিমা তোমাৰ৷৷

পাপী বা অপাপী তাক অপ্ৰয়াসে চাৱে৷

তোমাৰ প্ৰসাদে স্থান শ্বেতদ্বীপে পাৱে৷৷৪৪ ৷৷

মোৰ অধিকাৰ ভৈল সকলে লুপুত৷

হেন জানি প্ৰতিমাক কৰিয়ো গুপুত৷৷

পাছে ময়ো যমৰায়ৰ বচনত থাকি৷

পুতি থৈলো প্ৰতিমাক বালুকায় ঢাকি৷৷৪৫ ৷৷

পাছে ইন্দ্ৰদ্যুম্নে তৈতে অশ্বমেধ যজি৷

কৃষ্ণ বলভদ্ৰ সুভদ্ৰাৰ মূৰ্ত্তি সাজি৷৷

দিব্য দৌল বান্ধি যেনমতে পূজিলন্ত৷

লক্ষ্মীত কহিলা হৰি সকল বৃত্তান্ত৷৷৪৬ ৷৷

ব্ৰহ্মাত পুছিলা মুনিসকলে দুনাই৷

ক্ষেত্ৰ গৈয়া কি কৰিলা ইন্দ্ৰদ্যুম্ন ৰায়৷৷

কহিয়ো হৰিষে শুনোহো পাছ কথা৷

বোলা ৰাম ৰাম জন্ম নকৰিয়ো বৃথা৷৷৪৭ ৷৷