ক্ষণেকতে সাজিলা প্ৰতিমা৷

দেখি ৰাজা পৰম মহিমা৷৷

বুলিলাহা বিস্ময়ে বচন৷

নোহো নৰ তোৰা দুয়োজন৷৷১৩৯ ৷৷

কিবা তোৰা দুয়ো সূৰ্য্য শশী৷

ব্ৰহ্মা ৰুদ্ৰ কিবা আছা আসি৷৷

নজানোহো স্বৰূপ সাক্ষাত৷

কৈয়ো সত্যে শৰণ তোমাত৷৷১৪০৷৷

শুনি বিষ্ণু বুলিলা বচন৷

নোহো ব্ৰহ্মা ৰুদ্ৰ আন জন৷৷

মই হৰি জগত ঈশ্বৰ৷

মোতে আছে যত চৰাচৰ৷৷১৪১ ৷৷

বেদান্ততো মোকেসে কহৱে৷

মোক স্মৰি পাতক দহৱে৷৷

তুষ্ট হুয়া দেখা দিলো আগে৷

লৈয়ো বৰ ৰাজা যেহি লাগে৷৷১৪২ ৷৷

স্বপ্নতো নেদেখে পাপী মোক৷

তুমি মোৰ মহাভক্ত লোক৷৷

যতেক পূজিলা নাহি লেখা৷

তাতেসে তোমাক দিলো দেখা৷৷১৪৩ ৷৷

শুনি ৰাজা তনু লোমাঞ্চিত৷

কৰে স্তুতি পৰিয়া ভূমিত৷৷

লক্ষ্মীকান্ত তোমাক প্ৰণাম৷

তনু যাৰ জ্বলে মেঘশ্যাম৷৷১৪৪ ৷৷

কৰে শঙ্খ চক্র পদ্ম গদা৷

তুমি শ্ৰীৰ নিৱাস সৰ্ব্বদা৷৷

শুতি থাকা ভুজঙ্গ শয্যাত৷

তুমি ব্ৰহ্ম ব্যাপক সাক্ষাত৷৷১৪৫ ৷৷

তুমি সূক্ষ্ম নিৰ্ম্মল নিৰ্গুণ৷

সৃষ্টি স্থিতি লয়ত নিপুণ৷৷

মোক্ষপদ জগত ঈশ্বৰ৷

কৰো পৰি প্ৰণাম বিস্তৰ৷৷১৪৬ ৷৷

দুনাই দুনাই কৰো নমস্কাৰ৷

কৰা প্ৰভু আমাক উদ্ধাৰ৷৷

তুমি দিয়া ভুকুতি মুকুতি৷

কৰো সেৱা সেহিসে যুগুতি৷৷১৪৭ ৷৷

দুনাই ৰাজা পৃথিৱীত পৰি৷

বিষ্ণুক বোলন্ত কৰ যুৰি৷৷

ঋষিগণ দেৱাসুৰ বল৷

যত যোগী সন্ন্যাসীসকল৷৷১৪৮ ৷৷

যিটো পদে সদা কৰে ধ্যান৷

ইচ্ছা তাক তৈতে দিয়া স্থান৷৷

মাধৱে বোলন্ত এহি হৌক

অন্তকালে পাইবা গৈয়া মোক৷৷১৪৯ ৷৷

নকৰিবা সংশয় ইহাত৷

নিষ্ঠ কৰি বুলিবো তোমাত৷

কৃষ্ণৰ কিঙ্কৰে এভু ভণে৷

হৰি হৰি বোলা সৰ্ব্বজনে৷৷১৫০৷৷