বোলন্ত শুকে শুনা পৰীক্ষিত৷

ভক্ত প্ৰহ্লাদৰ কহো চৰিত৷৷

যুধিষ্ঠিৰ আগে নাৰদে কৈলা৷

শুনিয়ো প্ৰহ্লাদৰ যেন ভৈলা৷৷২১৬৷৷

ব্ৰহ্মাৰ মানস চাৰি তনয়৷

ভ্ৰমন্ত আকাশে আনন্দময়৷৷

পাঞ্চ বৰিষীয়া শিশু সঙ্কাশ৷

নাহিকে বস্ত্ৰ সৱে দিগৱাস৷৷২১৭৷৷

আনন্দে লোকক চাহান্তে ফুৰি৷

দিনেক দেখিলা বৈকুণ্ঠপুৰী৷৷

আতি আনন্দিত বিষ্ণুৰ থানে৷

সৱে চতুৰ্ভুজ পুৰুষ মানে৷৷২১৮৷৷

যতেক ৰমণী লক্ষ্মী প্ৰত্যেক৷

কল্পতৰু সম বৃক্ষ যতেক৷৷

বৈতালিকগণ পৰম ৰঙ্গে৷

হাতত তাল নাৰীগণ সঙ্গে৷৷২১৯৷৷

গাৱন্ত কৃষ্ণৰ গুণ চৰিত৷

আনন্দতে দ্ৰৱে সৱাৰো চিত্ত৷৷

সুগন্ধি বায়ুক কৰে ধিক্কাৰ৷

সিবেলা মনক মোহে আমাৰ৷৷২২০৷৷

ভ্ৰমৰ ৰাজে গাৱে হৰিগীত৷

যতেক পক্ষী তাতে দেয় চিত্ত৷৷

নকৰে আৰাৱ থাকে নিচুকে৷

কৃষ্ণৰ চৰিত্র শুনে উৎসুকে৷৷২২১৷৷

চড়ি ৰত্নময় দিব্য বিমানে৷

যতেক সুন্দৰী পদ্মিনী মানে৷৷

হাস লাস কৰি দৰশ গাৱ৷

বৈষ্ণৱ জনৰ নুপজে ভাৱ৷৷২২২৷৷

হৰিৰ গৃহে মহালক্ষ্মী মাৱে৷

হাতে ফুৰাই পদ্ম ভ্ৰমন্ত পাৱে৷৷

দেখিয়া স্ফটিক বাৰৰ গুণি৷

মাঞ্জে গৃহ যেন লক্ষ্মী আপুনি৷৷২২৩৷৷

গোৱিন্দৰ গুণ চৰিত্ৰ বাজে৷

শুনে গ্ৰাম্য কথা যিটো নিলাজে৷৷

বৈকুণ্ঠে নযাৱে সিটো ভাগ্যশূন্য৷

কু-কথায়ে হৰে সমস্তে পুণ্য৷৷২২৪৷৷

তমো নৰকে হোৱে চিৰবাস৷

আপুনি চিন্তে আপুনাৰ নাশ৷৷

দেৱৰো বাঞ্ছনী মনুষ্য জন্ম৷

উপজে তাত যত জ্ঞান ধৰ্ম্ম৷৷২২৫৷৷

নকৰে কীৰ্ত্তন ইহাক পায়া৷

জানিবা তাক লঙ্ঘে বিষ্ণুমায়া৷৷

হেন জানি আন আলাপ এৰি৷

বোলা হৰি হৰি সমাজে বেঢ়ি৷৷২২৬৷৷