বোলন্ত প্ৰহ্লাদ উঠ উঠ৷

তোৰ ভক্তিত ভৈলো মহা তুষ্ট৷৷

লৈয়ো বৰ তোৰ যেন মন৷

বৃথা নোহে মোৰ দৰিশন৷৷৪৪৭৷৷

মোক দেখিলেক যিটোজন৷

নাহি তাৰ পুনৰাগমন৷৷

ভকতৰ পূৰো মনোৰথ৷

দেঞো কাম মোক্ষ ধৰ্ম্ম অৰ্থ৷৷৪৪৮৷৷

এহি বুলি প্ৰলোভন্ত বৰ৷

নবাঞ্ছন্ত প্ৰহ্লাদ কুমৰে৷৷

ভক্তিসে পৰম লাভ জানি৷

বিষ্ণুক বোলন্ত হাসি বাণী৷৷৪৪৯৷৷

জানো প্ৰভু পৰীক্ষা আমাক৷

সিহেতু বুলিলা হেন বাক৷৷

বাঞ্ছে ফল কৰি তযু কৃত্য৷

সিটো বাণিজাৰু নোহে ভৃত্য৷৷৪৫০৷৷

তোমাৰ অকাম ভৃত্য আমি৷

তুমিও নিষ্কাম মোৰ স্বামী৷৷

নাহি কাম আমাৰ অন্যথা৷

নুহি ৰাজসেৱকৰ যথা৷৷৪৫১৷৷

শুনি নৰসিংহে হাসিলন্ত৷

জানো তঞি ভকত একান্ত৷৷

তথাপিতো ইটো মন্বন্তৰ৷

হুয়া থাক দৈত্যৰ ঈশ্বৰ৷৷৪৫২৷৷

সদায়ে শুনিবি মোৰ কথা৷

মোৰ ৰূপ চিন্তিবি সৰ্ব্বথা৷৷

কীৰ্ত্তনে পলাইবে পাপচয়৷

ভোগ ভুঞ্জি পুণ্য কৰা ক্ষয়৷৷৪৫৩৷৷

তোৰ যশ ব্যাপিব জগতে৷

ৰাত্ৰি দিনে মোক সুমৰন্তে৷৷

সৱে কৰ্ম্মবন্ধ হৈব ক্ষীণ৷

অন্তকালে মোত যাইবি লীন৷৷৪৫৪৷৷

তোৰ মোৰ কথা যিটো নৰে৷

তোক মোক সময়ত স্মৰে৷৷

সিও জনে মোক পাইব আসি৷

প্ৰহ্লাদে মাতন্ত পাছে হাসি৷৷৪৫৫৷৷

তযু পাৱে মাগো এক বৰ৷

তুমি প্ৰভু জগত ঈশ্বৰ৷৷

তোমাক নিন্দিলে পিতৃ মোৰ৷

সিজিল পাতক মহাঘোৰ৷৷৪৫৬৷৷

তাত হন্তে পিতৃ নিস্তৰোক৷

এতেক প্ৰসাদ দিয়া মোক৷৷

তুমি দীন দয়াশীল দেৱ৷

তোমাৰ চৰণে কৰো সেৱ৷৷৪৫৭৷৷

কহে কৃষ্ণ কিঙ্কৰে শঙ্কৰে৷

নেৰিবা কীৰ্ত্তন একো নৰে৷৷

আজি কালি মিলিবে মৰণ৷

হৰি হৰি বোলা সৰ্ব্বজন৷৷৪৫৮৷৷